Una scission d’esquèrra del partit egemonic de la val pretend “reprene lo projècte autonomista e progressista”. Lo candidat per las eleccions serà un èx-conselhièr de la Cultura e de l’Ensenhament del govèrn valdostan. Los autres partits de la val son fòrça critics amb la creacion de la nòva formacion.

Fa de temps que se prevesiá: las garrolhas intèrnas de l’Union Valdostana (UV) an acabat amb una scission promoguda per de membres de perfil progressista d’aquela formacion politica, egemonica dins la Val d’Aosta dempuèi de decennis. La scission se produsiguèt lo 23 de decembre, mas es ara que se’n veson las repercussions sus l’opinion publica, pendent la campanha per las eleccions generalas italianas que se debanaràn los 24 e 25 de febrièr que venon.
 
En un messatge adreiçat a la direccion de l’UV, Alessia Favre, presidenta constituenta del movement nòu, qu’a pres lo nom d’Union Valdostana Progressista (UVP), analisava las causas de la scission. Remembrava que l’UV nasquèt coma un movement, e amb lo temps venguèt un partit, amb totas las limitacions que compòrta aquel mot, almens dins la Val d’Aosta... Lo cambiament de denominacion, çò remarcava Favre, es pas un fach purament formal. “Perque un movement, a la diferéncia d’un partit, defend pas sonque los interèsses d’una part de la comunautat, mas tota la comunautat amassa [...]. Lo movement, al contrari de çò que realiza un partit, obesís pas [en lo nòstre cas concret de la Val d’Aosta] als òrdres provenent de Roma e a las logicas estatistas, mas defend l’autonomia e los ideals federalistas”.
 
Segon Favre, L’UV es venguda un partit clarament centralizaire, que se mòu empench per una subsidiarietat caracterizada “per una concepcion autoritària en las presas de decisions”. E apondèt que l’UVP es dispausada a far que los valdostans “pòscan viure plan, coma de mèstres e de senhors, en cò lor, individualament e collectiva”. La nòva formacion aspira a amassar las nòvas generacions que se tròbon al delà de la politica, los ancians votants decebuts, las personas que vòlon seguir de metòdes politics desparièrs e quitament de politics en activitat per “reprene lo projècte autonomista e progressista”.
 
 
La candidatura per las eleccions italianas que venon
 
Davant l’imminéncia de las eleccions italianas, l’UVP a designat coma candidat Laurent Viérin, ancian conselhièr de la Cultura e de l’Ensenhament del govèrn de l’UV. Segon Viérin, las relacions entre l’estat e l’autonomia de regim especial qu’es la Val d’Aosta an tendéncia a redusir las competéncias del govèrn autonòm en benefici de las tendéncias recentralizairas que manifèstan la granda majoritat dels partits politics italians. L’UVP met en garda l’opinion publica valdostana sus aquela question. A l’encòp, dona d’arguments per far veire que, per s’opausar al centralisme estatal, cal unir de fòrças e elaborar un novèl discors sul besonh de recuperar las valors qu’alimentan l’identitat del pòble valdostan.
 
L’UVP ditz que cèrca de complicitats amb d’autres movements de la Val d’Aosta, mas a pas capitat de pachar cap de lista conjoncha per las eleccions, e mai s’o a plan ensajat amb lo Partit Democratic (PD). Cèrtas s’aliarà pas amb los seguidors de Monti e Berlusconi, que lo partit los qualifica d’“enemics de l’autonomia”.
 
Segon los dirigents de l’UVP, Viérin es la persona mai capabla de canalizar “lo màger consens dins lo nòstre projècte politic” e es ja “un digne representant de la Val d’Aosta dins lo Parlament italian, dempuèi totjorn portaire e interprèt dels tèmas restacats a l’especificitat valdostana”. Lo quite Viérin afirma que comença una estapa de combat per relançar las idèas autonomistas e federalistas, que contrastan amb de plans del caire estatal que tendon a los mesestimar.
 
 
Los autres partits de la val, critics amb la decision
 
La candidatura de l’UVP es pas estada brica ben recebuda pels autres partits autonomistas de la Val d’Aosta. Lo president de l’UV, Ego Perron, a dich qu’a fach “tot çò possible” per evitar la scission, mas que los scindits fasiá de temps qu’o avián “tot preparat”. Perron los a acusats de voler “destruir lo movement”.
 
A pas tanpauc estalviat de criticas lo conselhièr valdostan Alberto Bertin, del partit autonomista d’esquèrra ALPE, que l’ UVP presumidament li disputarà l’espaci electoral. Segon Bertin, la creacion de l’UVP obesís solament a la recèrca “del poder per se meteis”. La Val d’Aosta, çò a dich lo representant d’ALPE, “aviá pas de besonh” d’un nòu partit “creat al darrièr moment”. ALPE es, de fach, lo partit qu’anarà en coalicion amb lo PD, lo pache que cercavan los dirigents de l’UVP.
 
 
 
 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.