Un grop de persones a lançat petards, a insultat e a agredit, era net de dissabte a dimenge en Vielha, as sies agents deth còs policièr catalan des Mòssos d’Esquadra que hè quauqui dies e dormien en carrèr entà protestar contra es retalhades en sòn salari. Tres des policèrs son greujadi, damb ua estòrça e talhs ena man.

Peth moment, an arrestat a ua persona qu’a arreconeishut er atac e son a recercar qui mès i a participat. Eth sindicat des mòssos, qu’auien ja avertit que pendent era dimenjada de magràs e podien èster victimes de bèth acte de vandalisme, an confirmat que se personaràn coma acusacion particulara contra es agressors, ei a díder, que vieràn demandadors en jutjament.
 
Es Mòssos hè set dies que dormissen en tempèri entà reclamar un lòc a on víuer es dues setmanes que les cau trabalhar. Son destinadi luenh de casa e actuauments, dempús dera reduccion de 15% deth sòn salari, planhen que non pòden cap pagar es despenses des apartaments qu’auien logadi ena Val d’Aran.
 
Es policièrs comencèren era protèsta en tot acampar dauant deth comissariat de Vielha, mès er Ajuntament ne demanèc eth deslotjament pr’amor qu’eth campament e ère illegau. Alavetz es mòssos decidiren dormir ath tempèri, jos eth pòrge der Ajuntament de Vielha.
 
Dempús der assaut, es policièrs an demanat ath capelhan dera parròquia de Vielha se podien dormir ena glèisa, mès les a dit que non. Segontes eth curat, les calerie dormir en comissariat, mès aquiu eth departament d’Interior dera Generalitat de Catalonha les ac a tanben enebit.
 
Maugrat eth sòn desacòrd damb era manèra de protestar des policièrs, eth baile de Vielha, Àlex Moga, condemnèc er atac en moment que ne siguèc informat. “M’acaben d’informar qu’aguesta net passada, un grop de persones an agredit ath grop de Mòssos d’Esquadra que dormien enes cuberts der Ajuntament. Era mia mès energica condemna ad aguesta agression e a totes que deriven de conductes irracionals e irrespetuoses”, ce publiquèc en sòn Facebook eth baile deth cap-lòc aranés.




FM




_____
Es policièrs en protèsta expliquen es sues revendicacions ena cadea espanòla de television La Sexta