Lo Blòc Quebequés (BQ), partit independentista de Quebèc, auriá melhorat de 2 deputats lo resultat electoral de 2019 dins l’eleccion federala de Canadà tenguda aqueste diluns, ont a ganhat tornarmai lo liberal Justin Trudeau. Lo cap del partit independentista, Yves-François Blanchet, diguèt dimenge que tot resultat al dessús dels 32 deputats, los qu’avián fins ara, seriá bon, mas que n'aténher 40 —mai de la mitat dels 78 que se vòtan en Quebèc— seriá genial. Fin finala, sembla que n’a obtenguts 34. Amb aquel resultat seriá tresena fòrça, darrièr lo Partit Liberal de Trudeau e los conservators d’Erin O’Toole. La quatrena fòrça seriá l’NPD (socialdemocratas) de Jagmeet Singh e lo Partit Verd, amb solament 2 deputats. Escrivèm aqueste article quand lo recompte dels vòtes es al 98,44% dels bulletins.
 
De son latz, Trudeau, a pas capitada sa tòca d’aver la majoritat absoluda. Convoquèt l’eleccion anticipada dos ans abans, influit pels bons sondatges que l’acompanhavan, mas sembla que son idèa èra pas tan bona coma o pensava. Aviá fins ara 155 deputats del 338 que i a dins la cambra, mas ara n'obten 158, encara luènh dels 170 que marcan la majoritat absoluda.