La Cort Europèa dels Dreches Umans (CÈDU) a condemnat Russia per l’assassinat per empoisonament de l’èx-membre del KGB Aleksandr Litvinenko a Londres en 2006.
 
Dètz ans pus tard, l’enquista confirmava qu’èra mòrt a causa d’un element radioactiu estranh apelat polòni 210. “Soi convencut que Sénher Lugovoi e Sénher Kovtun metèron de polòni 210 dins la teièra del Pine Bar, lo 1r de novembre de 2006”, çò afirma lo jutge Sir Robert Owens dins lo rapòrt de l’enquista. Ara la CÈDU considèra que Lugovoi e Kovtun èran d’agents de l’estat rus, e apond que “l’administracion de Vladimir Putin a pas portat cap d’explica satisfasenta ni convencenta que poguèsse contestar la conclusion de l’enquista britanica”. A aqueles moments Litvinenko examinava l’assassinat de la jornalista Anna Politkovskaia, critica amb lo Kremlin. 22 jorns puèi, morissiá.
 
La senténcia de la CÈDU establís, a l’unanimitat, que lo govèrn rus manquèt a l’article 38 de la Convencion Europèa dels Dreches Umans, concretament l’obligacion d’aduire totes los recorses e facilitats necessaris per metre en examen l’afar. E afirma tanben —amb lo vòt contrari del jutge rus— qu’a mancat a l’article 2 de l’acòrdi, lo drech a la vida, en qualques aspèctes fondamentals.
 
De fach, dins son lièch de mòrt, Litvinenko acusèt Putin de son assassinat. Puèi, confirmèt aquela acusacion dins una letra postuma legida per un amic: “Pòdes aver de succès per me far calar, mas lo silenci a un prètz. Sès tan barbar coma dison los que te critican”, çò ditz l’escrich.