Se los barratges del Championship foguèron sens suspresas, foguèt pas lo cas per la Superliga ni mai per las mièjas finalas de l’NRL.
 
 
Superliga: los favoritsdels barratgesan acabada la sason
 
La formula de las pelhòfas de Superliga vòl que lo primièr recépia per sa mièja finala l’esquipa qualificada la mens ben classada.
 
Aprèp la partida sarrada del dijòus de ser (0-0 a la pausa), los catalans pensèron que seriá Leeds que vendriá a Brutus: de Rinocèros que mercé a un ensag transformat e una penalitat ganhavan a Wigan: 8-0.
 
Èra comptar sens Hull KR que deguèt batalhar fins a la darrièra jornada per assegurar la seisena plaça qualificativa e qu’s’anèt impausar divendres de ser 19-0 cò de Lops de Warrington que mosseguèron pas gaire.
 
En mièja finala, los Dragons reçaupràn doncas los Barbarosses aqueste dijòus a 9 oras manca un quart del ser a Brutus dins un estadi que deuriá afichar complet. Divendres de ser, Saint Helens reçauprà Leeds.
 
Los venceires se balharàn rendètz-vos pel dissabte 9 d’octòbre a Manchester per la finala.
 
 
Championship: encara doas partidas a ganhar pel TO!
 
En Championship, lo tresen Halifax se qualifiquèt fàcia al seisen Whitehaven 24-20 e lo quatren Batley contra lo cinquen Bradford: 23-10. En mièja finala, Featherstone reçauprà Halifax. De son costat, lo Tolosa Olimpic, que poirà enfin jogar a Ernèst Wallon, afrontarà los Dògols de Batley dissabte a 16h15.
 
Encara doas partidas de ganhar e Tolosa serà en Superliga!
 
Las partidas dels Dragons e de Tolosa seràn retransmesas en dirècte per BeInSport, mas es del dever de totes los esportius d’emplenar los estadis de Perpinhan e de Tolosa per veire e viure de grands moments d’espòrt. Serà un grand plaser puèi de dire: “Aquel jorn, ieu, i èri!” e d’afirmar que vòstra participacion foguèt decisiva per la resulta obtenguda!
 
 
NRL: un Pantèras-Lapinons en finala
 
Divendres, se deguèt retardar la debuta de la partida entre Manly e los Lapinons, que las Aglas se trapèron dins un tap rotièr que retardèt lor arribada a l’estadi! Per Manly, los problèmas de circulacion se contunhèron sus la pelena ont los Lapinons poguèron guimbar e sautar gaujosament e eficaçament per prene lo camin de la finala amb una larga victòria: 36-16.
 
L’autra mièja finala entre Melbourne e Pantèras foguèt d’un autra farina. Una farina que virèt en bren e en sopa de morres per la Tempèsta: dos jogaires lèu nafrats e una multiplicacion espantanta de decas de man (un vintenat). Sus una passa al pè magica de Nathan Cleary, Penrith dobrissiá la marca per un ensag de l’alièr Crichton tre la tresena minuta. Entre ensag refusat pel vidèo e palma tombada al moment de marcar pel campion, la marca demorava atal fins a la pausa (6-0). A la represa, Melbourne dominava mas, sus un contra, es Penrith que marcava. L’arrièr Ryan Papenhuyzen marcarà plan un ensag, mas son las Pantèras que filan en finala (10-6).
 
Una finala que per un còp se debanarà a Brisbane aqueste dimenge 3 d’octòbre (a 10h30 del matin, ora occitana) .
 
 
Torneg a 9 per l’Elèit 1
 
Abans la represa del campionat a la mitat d’octòbre, los jogaires d’Elèit 1 van poder tornar trapar las pelenas amb de torneges de rugbi de 9 que se tendràn las doas dimenjadas venentas. Aquestes 2 e 3 d’octòbre, los rendètz-vos son fixats a Vilanòva, Carcassona e Avinhon.
 
 
 
 
Alan Roch