Francés Boya qu’a guanhat eth prèmi Lengua Viua autrejat ena ocasion dera 27u edicion dera corsa Aran per sa Lengua, realizada en Aran aguest dimenge passat. Er èx-sindic d’Aran e actuau secretari generau entara escomesa demografica deth govèrn espanhòu, a estat guierdonat peth sòn prètzhèt en favor dera difusion der aranés e dera sua produccion literària e musicau. Sus Twitter, Boya qu’a mercejat aquera arreconeishença que l’a voluda “compartir damb toti es que trabalhatz en favor dera nòsta cultura e dera nòsta identitat”.
 
Era 27u edicion dera Corsa Aran per sa Lengua se debanèc dissabte passat, 25 de seteme, damb era participacion de centenats de persones. Se clauèc damb un concèrt d’Alidé Sans e de Sarabat.
 
Era corsa ei ua manifestacion per usatge sociau dera lengua deth país ena quau fòrça aranesi trauèrsen era Val, a pè o en tot córrer. Es correires que gessen de Les, de Montgarri o deth Pòrt de Vielha e que s’amassen ath ser ena plaça de Vielha.
 
Organizada peth collectiu aranés Lengua Viua, era Corsa Aran per sa Lengua se debane cada an, generaument ena darrèra dimenjada de junhsèga. “Qui ten era lengua ten era clau”: qu’ei eth lèma d’aquera corsa, extrèt d’un poèma de Frederic Mistral. Enguan es circonstàncies sanitàries l’an ajornada ath començament dera tardor.

 

Gràcies a #LenguaViua per aguest reconéishement que voi compartir damb toti es que trebalhatz en favor dera nòsta cultura e dera nòsta identitat. #Aranpic.twitter.com/dtuPxbEfW9

— Francés Boya Alós (@Pacoboya) September 25, 2021

 

Dissabte, centenats de persones participèren en ena corsa Aran per sa Lengua en tot reivindicar er usatge sociau der #aranés, organizada peth collectiu Lengua Viua. E eveniment se clauec damb concèrts d’Alidé Sans e Sarabat pic.twitter.com/bqGMh6tyFA

— Occitan aranés (@occitan_aranes) September 27, 2021