Los legeires interessats en politica europèa auràn seguit las eleccions federalas alemandas tengudas dimenge passat e que lor resultat daissa la pòrta dobèrta als paches de divèrsa sòrta. De soslinhar, totun, lo resultat d’un partit que representa la minoritat frisona e danesa e qu’a obtengut un deputat al Bundestag per primièr còp dempuèi 1949.
 
L’Associacion dels Electors del Schleswig Meridional (SSW) es un partit que representa las minoritats frisona e danesa de l’estat de Schleswig-Holstein. La formacion a obtengut 55 330 vòtes al sufragi proporcional, lo 3,2% dels vòtes de l’estat, amb un resultat mai que mai naut dins los districtes de Flensburg- Schleswig, amb lo 9,2% del total dels vòtes e lo 6,6% dins lo de Nordfriesland – Dithmarschen Nòrd. Car l’SSW representa una minoritat nacionala, es pas limitat pel lindal del 5% del vòte. Per tant, aurà un deputat al Bundestag.
 
Lo cap de lista, lo politician danofòn Stefan Seidler, serà aquel representant al Bundestag.  “Es un resultat istoric e enòrme per la comunautat danesa”, çò a dich en tot revendicar lo besonh d’agachar mai devèrs Escandinàvia. Lo partit demanda tanben de situar l’estat de Schleswig-Holstein a l’agenda de Berlin, perque considèra qu'es sovent desmenbrat per las autoritats federalas, e reclama tanben mai de finançament e de melhoras infrastructuras.
 
L’SSW se presentava pas pus a las eleccions federalas dempuèi 1961 e o a fach ara en seguida dels bons resultats locals e estatals obtenguts dins lo darrièr decenni.