capçalera campanha

Actualitats

InternacionalPolitica

Catalonha commemòra e revendica lo referendum del 1r d’octòbre de 2017

Un omenatge als nòrd-catalans que protegiguèron las urnas e los bulletins de vòte inaugurava una tièra d’eveniments multitudinaris pertot

Tèxte legit

De milièrs de personas marchèron ièr per las carrièras de Barcelona en revendicant la memòria del referendum d’independéncia del 1r d’octòbre de 2017 e la  cauma generala consecutiva que i aguèt dos jorns puèi, la mai reüssida de l’istòria de Catalonha. Un grand eveniment politic clavèt tres jornadas de manifestacions, mobilizacions e omenatges per totes los Païses Catalans,per tal de revendicar aquel referendum istoric e condemnar las violéncias policièras d’aquela jornada e la repression que l’an patida los independentistas en seguida, amb d’elegits en preson e en exili e mai de 3000 personas totjorn represalhadas.
 
 
Reconeissença exprimida als nòrd-catalans
 
Los eveniments de commemoracion comencèron divendres a Illa, en Catalonha Nòrd. Se rendèt omenatge als nòrd-catalans que faguèron venir possibla la mesa en plaça de las urnas e dels bulletins de vòte en esquivant la polícia espanhòla qu’o voliá empachar. I participèron las associacions independentistas e tanben d’elegits catalans dels dos caires de la frontièra politica.
 
De soslinhar lo discors de la consolessa màger de Els Banys d’Arles, Marie Costa, quand assegurèt que los nòrd-catalans avián comprés “l’enjòc e l’importància del combat”. Costa diguèt: “Aicí se faguèt los bulletins de vòte, aicí se crompèt las urnas, d’aicí foguèron menadas al Principat del temps que la Gàrdia Civila perquisicionava de magazins e d’entrepresas. Gràcias a tot aquò se poguèt far lo referendum, mas l’estat espanhòl reagiguèt amb violéncia”.
 
Puèi, una marcha de veituras que portavan d’urnas se gandiguèt a Figueres ont i aguèt una reünion politica e un concèrt.
 
A mai, dins los burèus de vòte que subiguèron los atacs pus fòrts de la polícia espanhòla se tenguèt mai d’una ceremònia de remembrança en tot revendicar lo resultat del referendum.
 
 
Lo govèrn de la Generalitat se’n declara “fièr e eiretièr”
 
Quant al govèrn de la Generalitat, el tanben organizèt un eveniment commemoratiu dins lo qual son president, Pere Aragonès, defendèt lo recobrament de l’esperit d’aquela jornada e un nòu referendum. En mai d’aquò, assegurèt que son govèrn se declarava “fièr e ieretièr del 1r d’octòbre” del temps que s’engatjava “a contunhar lo camin devèrs l’independéncia”.
 
 
De manifestacions e de marchas a pè
 
Mentretant, per tota Catalonha avián luòc divèrsas manifestacions per se recordar d’aquel 1r d’octòbre jol lèma “ni oblit ni perdon”. Las divèrsas manifestacions èran convocadas per soslinhar que los que rendèron possible aquel referendum “son pas estats vencuts”.
 
Demest totes los eveniments, cal remarcar las tres marchas a pè simultanèas qu’amassèron de milièrs de personas que caminèron una vintena de quilomètres, del nòrd, del sud e de l’oèst de Catalonha. Las marchas s’acabèron sus d’endreches emblematics d’aquela jornada de 2017.
 
 
 
 
 
 
 
 
 
 


abonar los amics de Jornalet

 


 
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris


I a pas cap de comentari

Escriu un comentari sus aqueste article