Lo tèxt definitiu del projècte de lei sus lo maridatge e l’adopcion per los parelhs omosexuals s’aprovèt ièr a l’Assemblada francesa, après de jorns de debat intens, dins la cambra e defòra, perque la proposicion —e promessa electorala de François Hollande— a provocat un fòrt debat social, e aquestas darrièras setmanas de manifestacions se son debanadas en favor e contra.
 
Lo debat del projècte de lei s’acabèt dissabte passat. Pendent los dètz jorns prèvis, los deputats avián debatut e votat los cinc mila emendaments presentats al tèxt. Lo vòte solemne se debanèt ièr de ser. L’esquèrra i votèt en favor (329 vòtes) pr’amor que considèra que la proposicion es una avançada cap a l’egalitat de dreches. L’oposicion de drecha votèt contra (220 vòtes), coma ja o aviá avertit. I aguèt 10 abstencions.
 
Un còp aprovat, lo tèxt passarà al Senat, ont, a partir del 18 de març, se poirà tornar presentar d’emendaments. I serà tanben aprovat, de segur, mercés al supòrt dels partits d’esquèrra.