Sason acabada en Austràlia, finalas de la Superliga dissabte amb los Dragons e del Championship dimenge amb lo TO., represa dels campionats d’Elèit: aquí l’actualitat tretzista d’aquesta debuta d’octòbre que serà rica en emocions e sensacions.

Superliga: los Dragons a Old Trafford
 
En tota logica, los catalans aniràn disputar la finala de la Superliga aqueste dissabte 9 d’octòbre a Manchester. Dijòus de ser, Brutus afichava complet per la recepcion d’Hull KR. Los Sang e Aur jògan sens Sam Tomkins, nafrat. Artur Morgue manca la recepcion de la primièra candela, mas es sus una palma raubada a l’arrièr anglés que lo capitani local, Benjamin Garcia, dobrís la marca. Lo jòc s’equilibra. Los angleses se mòstran dangieroses. Drinkwater intercèpta una passa e va plantar l’ensag après 80 mètres de corsa. Coma qué, beure d’aiga vos pòt balhar de bonas cambas! Hull marca abans la pausa: 12-4 pels Sang e Aur.
 
Tre la represa, novèla recepcion mancada per l’arrièr roge e Morgue punta l’ensag. A l’ora de jòc, Fouad Yahz es a la conclusion d’un large movement collectiu. Lo jove Chan (19 ans) es lo primièr sus la palma aprèp un còp de pè al ras de pelena. 26-4: res pòt pas arribar als catalans qu’encaissan un ensag e ajustan per Maloney una penalitat per ganhar 28-10. Un torn de pelena d’onor e los caps son ja virats cap al grand estadi del nòrd d’Anglatèrra.
 
L’adversari serà lo campion 2019 e 2020 e deteneire de la Cup: Saint Helens. Divendres de ser, los Sants dominèron largament Leeds 36-8 per se ganhar la bilheta per la finala. Un brave talhon per balhar gost a l’olhada!
 
 
Championship: lo TO a una partida de la Superliga
 
Aqueste dissabte, lo TO ne finissiá amb un temps de 574 jorns sens aver pogut jogar a domicili! 8000 personas se recampèron a l’estadi Wallon per seguir la mièja finala fàcia als Dògols de Batley. Los angleses s’agafèron long del primièr temps (16-12 pel TO), mas lo segond periòde foguèt de tot en tot blau e blanc per una victòria clara: 51-12.
 
Dins l’autra mièja finala, los Barrutlaires de Featherstone ganhavan aisidament fàcia a Halifax: 42-10 e vendràn doncas a Tolosa aqueste dimenge 10 per jogar la finala sul còp de 7 oras del vèspre. L’enjòc es bèl: lo campion montarà en Superliga.
 
 
NRL: lo trofèu del campionat dins las urpas de las pantèras
 
Aquesta finala, jogada pel primièr còp de l’istòria del campionat australian a Brisbane, e non pas a Sydney, foguèt plan disputada entre los Lapinons e las Pantèras. Cada formacion marcava un ensag transformat dins lo primièr temps, mas una penalitat permetiá a Penrith de menar 8-6 a la pausa. Sus penalitat, los Lapinons tornavan a l’egalitat, mas una passa asardosa èra interceptada e Penrith preniá l’avantage 14-8. Los Lapinons capitavan de marcar un ensag: del recanton, Reynolds encapava pas la transformacion coma mancava una temptativa de tombat a dos punts. Penrith, dominat l’an passat per Melbourne, soslèva lo trofèu mercé a aquesta corta victòria: 14-12.
 
 
L’Elèit 2 dobrís lo talh
 
Fin finala, 11 esquipas participaràn al campionat d’Elèit 2, aprèp los retiraments de Tolon e Lion. La Federacion prevei 3 montadas al mai naut nivèl per la sason venenta. Quatre partidas se joguèron aqueste dissabte de vèspre. Las formacions catalanas anóncian la color amb 3 victòrias: Baó ganha a Selon 28-18, Illa domina Vilafranca 40-16 e Pià es sens pietat per l’Escura 60-12. Vilagalhenc-Argon va ganhar a Entraigas 18-12.
 
 
 
 
Alan Roch