Jérôme Fourquet, politològ, director del departament opinion de l'IFOP (Institut Francés d’Opinion Publica), organisme que s’ocupa de far de sondatges, es coautor de La France sous nos yeux (Seuil). Èra lo convidat del “Grand entreten” de la ràdio France Inter aqueste 5 d’octòbre.

Lo politològ Jérôme Fourquet a percorregut tota França per escriure son darrièr libre. Director del departament opinion de l'IFOP, es lo coautor de La France sous nos yeux. Économie, paysages, nouveaux modes de vie, amb Jean-Laurent Cassely. “Nos sèm inspirats en qualque biais de çò que faguèt Roland Barthes. El parlava del bistèc fritas, nosautres parlam del tacos e del kebab”, çò explicava al micro aqueste dimars 5 d’octòbre. “En estudiant los biaisses de viure, los païsatges, las faiçons de consumar, las referéncias culturalas, tot aquò nos ensenha fòrça de çò que la [cultura] francesa es venguda”.

 

 

Una cultura francesa de mai en mai globalizada

 

“Çò que vesèm dins tot aquò es l’infuéncia d’una globalizacion generalizada dempuèi lo mitan dels ans 1980”, çò ditz lo cercaire, qu’a ensajat de destriar las diferentas infuéncias segon las jaças culturalas a la manièra d’un arqueològ. Constata una acceleracion plan neta de l’influéncia nòrd-americana dempuèi lo mitan dels ans 1980. Un exemple parlant: en 1986, pel primièr còp, los filmes que faguèron mai d’un million d’intradas foguèron de filmes americans. Cal notar tanben una influéncia de mai en mai presenta de la cultura asiatica, amb los mangas, o los sushis. “La Japan Expo, organizada cada an a Villepinte (region parisenca) es lo tresen eveniment lo mai vesitat après lo Mondial de l’Automobila e lo Salon de l’agricultura”. Lo tacos resumís plan los cambiaments e las ibridacions que los an coneguts los abitants de França: un produch d’origina mexicana mas transformat e que se pòt adobar amb mai d’un ingredient, local o mai exotic. 

 

 

Una economia borrolada e una classa mejana copada en dos

 

Dins son libre, Jérôme Fourquet fa tanben lo compte rendut sevèr de la desindustrializacion de França ont “lo consum es lo principal motor de l’economia francesa e pas pus la produccion”. Lo politològ insistís: “Sèm una societat centrada sul consum”, çò qu’explica lo desvolopament d’una economia simbolizada per l’autoestrada e los entrepauses gigants.  Son mai de 5000 als nosèls d’autoestradas e apertenon pas totes a Amazon. Una societat de servici, doncas, ont una novèla oposicion apareis demest las populacions entre los que se fan servir e los que son al servici dels primièrs. D’aquel punt de vista, la revòlta dels Gilets Jaunes foguèt reveladoira. Una dels menaires del movement, Ingrid Levavasseur, èra justament emplegada d’un ostal de retirada. La rompedura passa al dintre de la classa mejana e s’aprigondís, entre los que son capables de manténer un nivèl de vida pro naut e los que se replegan sul comèrci hard-discount e que ròtlan en Dacia.

 

 

Una vida de mai en mai resumida a la recèrca d’un bonaür privat

 

Los dos autors remarcan tanben que l’immobilièr e l’amainatjament de l’ostal ocupa una plaça màger dins la vida dels franceses. Evòcan Stéphane Plaza, “l’agent immobilièr mai celèbre de França”, animator d'una emission televisada plan seguida sus lo canal de television M6, e consagrada a l'ostal. Aquò seriá l’element revelador d’un cambiament de paradigme civilizacional, centrada sul triptic: ostal, jardin amb piscina e trampolin, ecran planièr. Çò que compta mai uèi lo jorn es lo bonaür privat, la piscina (França es lo pais ont n’i a mai per abitant après los Estats Units), mai que las grandas ideologias. Cita lo publicitari Jacques Séguéla  que “disiá que s’a 50 ans as pas crompat de Rolex, as mancada ta vida”. Dins lo país dels Gilets Jaunes, seriá puslèu s’a 40 ans pòdes pas pagar de Nike o de Nutella a tos enfants, sès pas un bon parent”.
 

Del caire de la politica, aquò explicariá l’abstencion massissa, segon Jérôme Fourquet que rescontrèt de nombroses electors. E n’i a que li an explicat perqué anèron pas votar al mes de junh passat al moment de las eleccions regionalas: “La crida de las grasilhadas pesava mai que lo passatge pel burèu de vòte”. Los dos tèrces d’aqueles ciutadans s’abstenguèron segon lo politològ.

 

Aquò poiriá tanben explicar en partida lo desengatjament que patissèm al dintre de l’occitanisme e del mond associatiu en general.

 

 

 

TH

 

L’entreten complet, en francés, es disponible aquí:


 

---

FOURQUET, Jérôme e CASSELY, Jean-Laurent. La France sous nos yeux. Seuil, 2021. 491 paginas. 23 èuros.