Dins l’estat francés dempuèi 1950, aperaquí 216 000 menors aurián subits los abuses sexuals d’unes 3000 prèires catolics. Aquò pertòca la màger part d'Occitània. Aquesta donada esglasianta se desvelèt dimars passat e fa partida d’una enquista que l’aviá comandada la glèisa catolica a una comission independenta suls abuses sexuales dins l’estat francés Aquela comission se creèt en 2018 après la revelacion de maites escàndols, e arunan anonciava de donadas esglasiantas, mas lo rapòrt definitiu que se publiquèt dimars passat es escandalós.
 
Segon aquel rapòrt, 216 000 enfants foguèron victimas d’agressions sexualas entre las mans de clèrgues catolics. Se s’i apond las donadas de las victimas dels laïcs que trabalhan dins l’encastre de la glèisa catolica, alavetz la chifra arriba a las 330 000 victimas. Quant als prèires o monges assalhidors, la comission calcula que son entre 2900 e 3200.
 
Aquela comission a trabalhat pendent dos ans e mièg e a publicadas sas conclusions après liurar lo rapòrt a las autoritats eclesiasticas e a las associacions de victimas. Mentretant, la comission a entrevistadas 6500 victimas e a fachas de recèrcas dins fòrça archius, eclesials e civils.
 
“Sèm arribats a la conclusion unanima que la Glèisa a pas sauput veire o a pas sauput comprene los senhals evidents que li arribavan sus aqueste problèma”, çò a declarat lo president de la comission, Jean-Marc Sauvé.
 
De son latz, lo president de la Conferéncia dels Evesques de França, Eric de Moulins-Beaufort, a dich qu’aviá aculhit lo rapòrt amb “vergonha” e a demandat publicament perdon.