Es govèrns d’Aran e de Catalonha haràn era prumèra amassada bilaterau dempús dera pandemia. Era reünion aurà lòc eth 13 d’octobre que ven, çò a explicat era sindica d’Aran, Maria Vergés, as jornalistes de Lhèida en tot soslinhar qu’un ahèr urgent a posar en orde deth dia ei era manca de sòs entà poder desvolopar es sues competéncies en lengua e cultura. Ath delà, Vergés a tanplan soslinhat qu’insistiràn en “desplegament intègre” dera Lei d’Aran per rapòrt ath regim competenciau qu'encara manque. Segons era sindica, son diuèrses es competéncies qu'encara non son “aterrades, ne desvolopades o en via de convèni”.
 
Vergés tanben pense a parlar d’auti tèmes coma era creacion des federacions esportiues araneses o se com s’aplique eth nau modèl de finançament d’Aran.
 
 
 
Era Lei deth regim especiau d’Aran
 
Era Lei deth regim especiau d’Aran arreconeish era realitat nacionau occitana damb identitat culturau, istorica, geografica e lingüistica; establís eth regim especiau pròpri d’Aran entà protegir-ne eth caractèr singular, es drets istorics, era identitat, eth dret e era organizacion institucionau, politica e administrativa, e ne garentís es competéncies, es ressorses e era autonomia pr’amor que govèrne es sòns interèssi.