Lo famós ditgèi francés David Guetta jogarà a Marselha lo 23 de junh que ven dins l’encastre de la capitalitat culturala d’Euròpa 2013. Las bilhetas per l’espectacle costaràn entre 44 e 60 èuros. L’eveniment a recebut una subvencion publica de 400 000 èuros, qu’a plan provocat la colèra de certans marselheses.

Segon Marsactu, far venir David Guetta a la Ciutat Focèa costarà 400 000 èuros al conselh municipal de Marselha, qu’es la soma qu’a versat a Adam Concèrt, la societat qu’organiza l’eveniment. La venguda del ditgèi parisenc dins l’encastre de Marselha Provença 2013 es prevista per la velha de Sant Joan, lo 23 de junh que ven, al Pargue Borely que la Comuna prèsta gratuitament e ont s’estima una capacitat per 23 000 personas. An mes las bilhetas en venda a de prèses entre 44 e 60 èuros.
 
De contribuents marselheses se son organizats contra la subvencion a aquel eveniment. D’un costat, Lionel Corsini, conegut jol nom de DJ Oil, a creat un grop sus Facebook nomenat “comando anti-23 de junh” qu’amassa a l’ora d’ara mai de 23 000 membres. Al delà, s’es lançada una peticion en linha que per ara amassa mai de 4000 signaturas. Totes son a demandar l’anullacion de la subvencion de 400 000 èuros.
 
Los opausants de la municipalitat son tanplan contra aquela subvencionassa e dobtan que las bilhetas per l’eveniment seràn vendudas, perque los prèses son pas abordables. En mai d’aquò, remembran qu’aquela subvencion despassa las condicions d’una circulara del Ministèri de la Cultura d’agost de 1998, que postulava que los eveniments subvencionats an de practicar de tarifas accessiblas a totes los publics.
 
La colèra creis en veire que segon lo compte rendut del conselh municipal, consultable en linha, los estanquets e los ponches de restauracion del public pòdon èsser explechats per Adam Concerts, la societat subresubvencionada.
 
Del sieu costat, la comuna disiá al jornal francés Le Figaro que la subvencion es justificada “per la reputacion internacionala” de Guetta que “participa a l’irradiacion que deu donar la vila de Marselha a las festivitats de Marselha Provença Capitala de la Cultura 2013”.