Lo cinquen fabricant mondial d’armas, l’entrepresa estatsunidenca Raytheon, fa de temps que trabalha sus un cercador que, a travèrs de l’esplecha de quantitats enòrmas de donadas personalas dispersadas dins los rets socials, ajuda a espiar e contrarotlar las activitats e los movements dels internautas. Lo programa s’apèla RIOT (sigla anglesa de Rapid Information Overlay Technology, mas riot significa tanben “riòta, susmauta”). E se sabiá qu’existissiá dempuèi  2010. Mas ara lo jornal The Guardian n’a obtengut un vidèo, d’ongan, ont se’n descriu lo foncionament e la capacitat per seguir los passes dels usatgièrs d’Internet e ne pronosticar la conducha.
 
Dins lo vidèo, un cercaire de Raytheon seguís los movements d’un obrièr a travèrs de son activitat en Facebook, Foursquare e Twitter, e los plaça sus una mapa mercés a las donadas de GPS enregistradas en d’aplicacions mobilas, çò que permet a RIOT d’obténer una lista de sos endreches mai vesitats, cronologicament.
 
Lo logicial, doncas, pòt predire de comportaments e de desplaçaments de las personas seguidas, una possibilitat que fòrça organizacions de defensa dels dreches de l’intimitat an ja criticat. Denóncian tanben que l’entrepresa estatsunidenca a confirmat qu’aviá partejat la tecnologia amb lo govèrn dels Estats Units, coma part d’un programa conjonch de desvolopament e recèrca.
 
Per Jared Adams, un pòrtavotz de Raytheon, “RIOT es un sistèma d’analisi de big data qu’avèm trabalhat amb l’indústria, de laboratòris nacionals e de sòcis comercials per convertir de grands volums de donadas en informacion utila, per fin d’ajudar als besonhs rapids e cambiadisses de seguretat del país”.