Las Copas del Mond de 13 remandadas a l’an que ven, un sol rescontre internacional es al programa aquesta tardor amb las oposicions de las equipas de França masculina, femenina e cadieral amb los angleses.

Doas partidas se tendràn aqueste dissabte 23 a l’estadi Brutus a Perpinhan: a una ora del vèspre, la partida feminina; a 3 e mièja, las doas esquipas masculinas.
 
Los seleccionaires an assabentat de las esquipas que se presentaràn sus la pelena.
 
Dins las 20 seleccionadas, se trapa fòrça jogairas de las Divessas Catalanas (6), de l’Escura (6) e de Tolosa Ovalia (4).
 
Los òmes pòdon pas comptar sus Benjamin Garcia, Julian Bosquet o Tèo Fages que son nafrats, ni mai suls jogaires d’Elèit 1 que reprenon tot bèl just la competicion. Lo grop  dels preseleccionats remosa doncas 10 Dragons, 9 jogaires del Tolosa Olimpic e Morgan Escarré (Salford).
 
Los angleses se presentaràn sens lor capitani, Sam Tomkins. Un alièr serà pas perdut sus la pelena de Brutus: Tom Davies, titular cò dels Dragons.
 
Autre seleccionat: l’arbitre occitan Benjamin Casty per dirigir los debats que se faràn amb las règlas actualas de la Superliga (pas de mesclanha).
 
D’esperar que lo public garnirà las tribunas per véser los eròis de la Superliga e del Championship, mas se demoratz a l’ostal, sapiatz que la partida serà retransmesa a la television en dirècte per ViaOccitanie e Sport en France (la cadena del Comitat Olimpic) e en leugièr diferit per L’Équipe, sens parlar de la retransmission radiofonica sus la mai tretzista estacion de la planeta: Radio Marseillette.
 
 
Elèit 1: carton plen audenc
 
Aquesta dimenjada, se teniá la primièra jornada del campionat Elèit 1, levat per Vilanòva exempt d’aqueste torn.
 
Albi e Tolosa dobrissián lo talh tre dissabte. Se vegèt que Batista Fabre, que joguèt pas nafrat la sason passada, aviá pas res perdut de sas qualitats: contribuiguèt bravament a la victòria dels Tigres: 31-22.
 
Dimenge, Carcassona s’anèt impausar a Avinhon 25-18. Son novèl menaire de jòc australian Brock Pelligra marquèt son primièr ensag de Canari.
 
Al Molin, lo campion Lesinhan se passegèt fàcia als Orses de Sent Gaudenç que cal esperar mai competitius per la seguida: 72-16.
 
A l’Agulha, los locals crentavan una formacion catalana que presentava de jogaires que se son entraïnats long de la sason amb los Dragons e que, per d’unes, an jogat qualques partidas en primièra. Los catalans èran mai fòrts, mai en forma a la debuta de la partida, mas tenguèron pas la distància. En fin de partida, lo dobertura local (e catalan!) Alan Toreilles ensaquèt lo tombat que levava lo punt de bònus defensiu als Sang e Aur: 25-12 (punt autrejat a las formacions que pèrdon de 12 punts al mai).
 
 
 
 
Alan Roch