Segon çò que raportava La Setmana dins son edicion numerica de ièr, lo Nid Biarnés, l’esqüat de Juranson, foguèt deslotjat ièr. Un cinquantenat de policièrs venguèron fòrabandir lo desenat d’estatjants a 7h30 del matin.
 
L’accès al luòc foguèt refusat als jornalistas de La Setmana, mas encontrèron lo mond expulsats, un desenat d’esqüataires que se tròban ara sens possibilitat de lotjament al mitan de l’ivèrn.
 
Lo Nid Biarnés es un ancian espital abandonat e una proprietat de la Crotz Roja francesa a Juranson (Bearn), qu’un grop d’esqüataires l’ocupèron per i bastir un espaci de creativitat, un albergament d’urgéncia e un luòc autogerit ont se pòt aprene de conviure dins un esperit de tolerància.
 
Es per aquò que l’endrech prepausèt d’espectacles, de concèrts, de projeccions, de repaisses collectius e d’autras activitats que l’occitan i aviá sa plaça.
 
Ça que la, de dirigents de la Crotz Roja francesa, proprietaris de l’endrech, an fach prevaler lo drech a la proprietat sul drech a l’abitatge, e ne demandèron l’expulsion immediata en plen ivèrn.
 
La còla de jornalistas de La Setmana a tanben entrevistat Clem e Nat, doas esqüatairas del Nid Biarnés, que contan lor expulsion. O podètz escotar sus l’àudio çai jonch.