Lo govèrn d’Àustria informa los ciutadans d’una eventuala crisi electrica. Aital, l’executiu d’Alexander Schallenberg vòl conscientizar los ciutadans d’una futura pana electrica illimitada en Euròpa. “La question es pas se i aurà una granda pana, mas quora”, çò a dich la ministra de la defensa, Klaudia Tanner.
 
Lo govèrn a començada una campanha d’informacion, tant suls mèdias coma per carrièras, que recomanda als austrians de se provesir dels produches necessaris per “subreviure” a la pana. Demest los materials e produches de subrevivéncia, segon lo Ministèri de la Defensa austrian, i a de carburant, de candelas, de batariás, d’aiga potabla e d’aliments en consèrva. A mai, l’armada soslinha l’importància que los ciutadans coopèren amb lors vesins e parents per evitar que degun rèste vulnerable o sens proteccion.
 
Lo govèrn austrian a decidit d’avertir la populacion de la possibla pana après aver avalorats qualques incidents recents. D’un caire, la casuda a l’escala mondiala dels rets socials restacats a Facebook, e d’autre caire l’aument del prètz de l’electricitat e l’escassetat del carburant al Reialme Unit. A mai, prenon en compte la crisi del microchip e l’encariment de las matèrias primièras.
 
Demest las mesuras presas en Àustria i a l’adaptacion de las casèrnas militaras abans 2025. Lo plan prevei que sián autosufisentas e que vengan d’espacis de sosten per las organizacions civilas coma los pompièrs e los personals de la santat.
 
Dins nòstra societat, totjorn que mai informatizada e tecnologica, una pana generalizada condicionariá practicament totas las activitats, quitament la circulacion per carrièras, la conservacion del manjar e, de tot segur, l’usatge d’espleches de comunicacion coma los ordenadors, los telefòns intelligents e Internet. Mas al delà de l’economia, l’impacte qu’auriá la pana sus la vida vidanta dels ciutadans es incalculable.