La vila d’Arle reclama a París sa Vènus. Lo cònsol màger, Patrick de Carolis, e la deputada Monica Michel reclaman lo retorn de l’escultura romana coneguda coma la Vènus d’Arle “dins sei tèrras natalas”, çò rapòrta Le Figaro. Dins una letra adreiçada a la ministra de la cultura, Roselyne Bachelot, los elegits arlatencs li demandan qu’estúdie “la possibilitat que lo musèu dau Lovre pòsca efectuar un depaus d’aquela òbra dins la vila ont espeliguèt”. Argumentan que seriá “un bèl exemple de la prioritat donada ai territòris que lo govèrn [francés] vòu actar mai pereu una formidabla oportunitat culturala per la treslusor d’Arle”.
 
De Carolis precisa que “l’idèa es pas de se reapropriar l’estatua que siguèt pas raubada”. Tot simplament demanda que, l’an que ven, quand Arle festejarà lo 40n anniversari de l’inscripcion d’uèch de sos monuments al patrimòni mondial de l’UNÈSCO, l’estat faga lo gèst de daissar l’estatua en Arle en depaus.
 
L’escultura se faguèt al sègle Ir abans lo Crist e es una còpia romana d’una escultura grèga que representava Afrodita. La trobèron en 1651 dins lo teatre roman d’Arle, partejada en tres tròces e sens braces. En 1683, los conselhièrs d’Arle la donèron al rei Loís XIV, que l’incorporèt al decòr del Palais de Versalhas. En 1798, intrèt al Musèu del Lovre. Son aspècte actual es la seguida de la restauracion que la faguèt François Girardon al sègle XVII, dont los braces. Al país, es especialament coneguda pels vèrses que los compausèron per ela los poètas Teodòr Aubanèu e Frederic Mistral.