Inspirat per l’òbra Los monològs de la vagina d’Eve Ensler, fa quinze ans nasquèt la campanha mondiala V-Day, que cèrca d’establir una connexion entre l’amor e lo respècte per las femnas e la fin de la violéncia masclista. Lo 14 de febrièr s’instituiguèt coma lo jorn de la V, una letra que fa referéncia a la vagina, a la victòria e tanben a Sant Valentin, lo jorn dels amoroses dins la tradicion anglosaxona. A l’escasensa del quinzen anniversari del V-Day, las impulsoras convidèron “un miliard de femnas, amb aqueles que las aiman, a prene las carrièras per dançar, se quilhar e exigir la fin de la violéncia”.
 
Es una violéncia, çò dison, qu’afècta un tèrç de las femnas sus la planeta pendent lor vida per d’agressions fisicas o sexualas. Cal cambiar d’urgéncia la situacion e eradicar la violacion, l’incèst, las agressions, la mutilacion genitala e l’esclavatge sexual, çò insistís la còla de V-Day, per capitar “un Mond ont las femnas pòscan viure amb seguretat e libertat”.
 
Amb lo lèma “Un miliard de femnas son una atrocitat, un miliard de femnas que dançan son una revolucion”, d’associacions e de collectius de tot lo Mond participèron a la jornada One Billion Rising (“montar a un miliard”) en organizant d’actes de tota mena.
 
En Occitània se debanèron d’eveniments a Ais de Provença (País d’Ais),  Andusa (Cevenas), Boc Bèl Èr (País d’Ais), Bordèu (Grava), Clarmont-Ferrand (Limanha), Mauborguet (Ribièra Bassa), Montpelhièr (Montpelhierenc), Narbona (Narbonés), Niça (Costièra Niçarda), Lei Penas de Mirabèu (País Marselhés), Sòrts e Òssagòr (Maremna), Tolosa (Tolosan), La Tor de Pèlitz (Val Pèlitz) e Valença d’Agen (Sèrras d’Agenés).