L’occitan rescontra de nombroses problèmas per èsser ensenhat a l’escòla publica Louis David de Castras. Los parents dels escolans e las associacions d’ensenhaires an lançada una peticion en linha sus change.org per atraire l’atencion sus aqueles problèmas e prepausar de solucions, per que l’ensenhament de l’occitan perdure dins aquela escòla, ont es present dempuèi 2003. La peticion la signan los parents dels escolans, Òc-Bi del departament de Tarn, lo Centre Regional dels Ensenhaires d’Occitan de Tolosa (CRÈO Tolosa), lo Centre Occitan del País Castrés e l’Institut d’Estudis Occitans d’Albigés.
 
Los peticionaris rapòrtan que “los nombroses problèmas de recrutament d’ensenhaires abilitats en occitan an mes en perilh las seccions bilinguas occitan-francés de la vila”. A mai, detalhan l’actitud erratica de l’administracion coma “una carta de l’ofèrta d’ensenhament de l’occitan aberranta e pauc legibla qu’obliga los escolans de la sola seccion de traversar la vila per perseguir aquel ensenhament” o tanben “l’abséncia de responsa de l’Educacion Nacionala, malgrat las nombrosas sollicitacions dels parents”.
 
Per tant, prepausan la creacion d’un grop de trabal qu’amasse los diferents actors de l’ensenhament public de l’occitan, l’estudi “seriós, pertinent e rapid” de la dobertura d’una nòva seccion bilingua e la dobertura d’un ensenhament de l’occitan al collègi Thomas Pesquet per permetre als escolans de l’escòla Louis David de contunhar l’aprendissatge de la lenga del país.
 
Per sosténer, podètz signar sus Change.org.