La societat multinacionala minièra Rio Tinto compta d’esplechar un immens jaç de jadarita en Serbia. Aquel mineral es ric en liti e bòr, indispensables als panèls solars e a las batariás electricas. Los abitants de Loznica refusan de sacrificar lor region al nom de la transicion energetica d'Euròpa, çò rapòrta Reporterre. Sustot pr’amor que la region es ja polluida dempuèi 2004 quand Rio Tinto comencèt d’explorar lo sossòl de la region de Loznica en provocant de pèrdas d’arsenic.
 
Dins aquela region, ont passa lo riu Jadar, descobriguèron en 2006 un nòu mineral que nomenèron “jadarita”. La jadarita es compausada de sòdi, liti, bòr, silici, idrogèn e oxigèn jos la forma d’idroxid de silicat de sòdi, liti e bòr (LiNaSiB₃O₇(OH)). Se tracta d’una potenciala sorsa de liti, emplegat a la fabricacion de batariás, e de bòr, emplegat dins los panèls solars e las eolianas. Rio Tinto compta d’extraire de tonas d’aquel nòu mineral a partir de 2026 e vòl investir 2 miliards d’èuros en Serbia per venir lo prinicipal productor de liti en Euròpa.
 
Dins sos comunicats, Rio Tinto afirma que la mina de Loznica poirà produire de liti per alimentar mai d’1 milion de veïculs electrics per an. Una perspectiva qu’a lo supòrt del govèrn sèrbe: aqueste sosten los arguments de la multinacionala e lausa las oportunitats economicas pel país.