Actualitats
La COP26 s'es acabada amb un acòrdi clarament insufisent
Se demanda als estats que tornen l’an que ven a la COP27 amb de plans mai especifics per combatre l’escalfament global
Tèxte legit
L’acòrdi final de la COP26 se pòt considerar leugièrament positiu dins lo sens qu’establís un consens mondial sul fach que cal agir immediatament, e que ditz que totes los estats devon far mai que çò qu’efectuan per frenar lo cambiament climatic. S’i marca qualques mesuras prioritàrias, coma la reduccion de las emissions de dioxid de carbòni e del gas metan, mas lo pache non precisa pas çò que ni qual son responsables d’aquelas emissions.
L’acòrdi afeblís quitament los tèxtes precedents, pr’amor que parla d’una “reduccion progressiva” del carbon, quand abans se’n exigissiá “l’eliminacion progressiva”. Aquel cambiament foguèt demandat per Índia e es estat fòrtament criticat per d'estats coma Soïssa, las illas Marshall e Mexic.
D’autre caire, qualques estats an fach de paches entre eles, al marge de la COP26. De soslinhar qu’una quarantena d’estats trabalharàn ensems per rendre melhor mercat l’electricitat, las veituras electricas, l’acièr e l’idrogèn. Tanben 450 bancas se son engatjadas a utilizar las finanças per avançar dins la reduccion totala d’emissions. De lor latz, los Estats Units e China son d'acòrdi per cooperar per agir contra l’escalfament global.
Dins dotze meses se tendrà en Egipte la COP27. Aquí, los estats deuràn explicar lors plans precises per aumentar la reduccion de las emissions e se veirà se s'es concretizat qualques acòrdis coma la reduccion del metan o la desforestacion.
|
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#4 Per juste demorar a la concentracion atmosferica actuala de CO2, nos caldria devesir per dos las emissions mondialas dins la decennia. Aquò's pas encara pro, pr'amor qu'ambe un tal nivèl, jamai conegut sul Tèrra dempuèi 3 millions d'annadas, lo rescalfament s'estabilizaria a +3°C. çò vòl dire de temperaturas fisiologicament insuportablas per l'èstre uman dins de regions uèi subre pobladas (India, Africa, China), la desertificacion fin al sud d'Euròpa, de ciclònes vertadièrs en Mediterranèa e d'oceans que pujarian de 20 mètres a long tèrme. Cal veraiament aténher la neutralitat carbona lèu, per fin que la concentracion de gases d'efièch de sèrra demenisca tornar jos 300 ppm.
De que sarià un acòrdi sufisent ?
Polidas charadissas diplomaticas puèi al final e sens sorprèsas, cadun son tròç e santa Greta per totis !
Cossi destrar las performanças climatics e environamentalas per cada estat ?
Ieu crezi que a estat una granda reüssida. Après meses de pandemia, los lideres dau mond an avut vacanças toteis ensems a Escocia. Coma dirián /dison elei " un gran trionf per la democracia "
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari