Actualitats
Mexic denóncia lo “pilhatge” de son patrimòni
A l’ocasion de la venda de 139 òbras d’art precolombian e taino, lo govèrn de Mexic denòncia amb fòrça lo comèrci illegal del patrimòni istoric. E critica la legislacion francesa que remanda a la bona volontat dels colleccionaires
Tèxte legit
Malgrat que cinc paises d’America latina se mobilizèsson contra aquò, la societat Christie’s prepausèt a la venda 139 òbras d’art precolombian e taino lo dimècres 10 de novembre a París. La velha, un comunicat comun de las ambaissadas de Colómbia, Guatemala, Honduras, Mexic e Peró reclamavan l’anullacion de l’eveniment, en denónciant lo “comèrci illegal” de lor patrimòni istoric, un combat de mal ganhar puèi que la legislacion francesa s’apièja sonque sus la bona volontat dels colleccionaires, çò rapòrta Le Monde. “Aquela mena d’eveniment encoratja lo pilhatge, lo trafec illicit e lo blanquiment dels bens per de màfias organizadas”, çò denóncian las cinc ambaissadas. Se tenguèt totun la venda a l’enquant, que raportèt mai de 3 millions d’èuros. Lo comol foguèt la venda d’una pigassa maia fargada en Mexic entre 550 e 950, que representa un òme contorsionat amb una sèrp dins los braces: raportèt 692 000 èuros. “Lo patrimòni cultural es pas un afar comercial”, çò declarava la ministra de la cultura mexicana al jornal LeMonde. “Exigissèm la restitucion de las òbras. Lor plaça es dins un musèu car representan l’identitat de nòstras civilizacions ancianas, e d’unas son uèi encara plan vivas.” D’efièch, Mexic compta 68 pòbles indigènas, çò que representa lo 10 % de la populacion totala.
Una lei francesa desfavorabla a la proteccion dels bens culturals e patrimonials estrangièrs
Las letras de protèsta mandadas a Christie’s an pas res donat, ja que la societat ditz qu’es en conformitat amb la lei francesa que fa passar lo drech de proprietat davant lo de la proteccion del patrimòni, çò qu’obliga de provar que las òbras son estadas aqueridas illegalament, una mission quasi impossibla. La ministra de la cultura Alejandra Frausto apond qu’aquela mena de practica encoratja tanben la contrafaiçon, coma o pròva un estudi realizat per l’Institut Mexican d’Antropologia e d’Istòria (INAI) que mòstra que sus 87 òbras prepausadas a la venda de dimècres, 15 serián falsas. Aquò per dissuadir los crompaires.
Sensibilizar los colleccionaires per far quitar aquelas practicas
La lucha entamenada per Mexic dempuèi 3 ans permetèt fins ara de recuperar mai de 5 000 òbras, mas França tornèt pas cap d’objèctes, al contrari de çò que faguèron Itàlia e Alemanha. Fàcia a una legislacion desfavorabla, Mexic ensaja de responsabilizar los crompaires per de campanhas d’informacion suls rets socials amb l'hashtag #MiPatrimonioNoSeVende.
El patrimonio cultural de México no es un artículo de lujo para adornar una casa. Que la protección del patrimonio cultural y combate al tráfico ilícito de bienes culturales prevalezca sobre los intereses comerciales. #MéxicosePronuncia#MiPatrimonioNoSeVende#SeAmaySeDefiendepic.twitter.com/Pa6mjjLv46
— Alejandra Frausto (@alefrausto) November 10, 2021
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#2
ahahahaha vos prussís ! Un briu d’espuma per las pòtas benlèu….. un bissòl ?
Vos auriatz degut trachar que son pas las estudis universitaris que faràn parlar lo mond en occitan, fan sonque parlar los occitanistas demesits ambe lor targa de sarnèga !
Lo pòble s’en trufa el, es pas aquò que lo fa viure.
Aquel biais de far reverta çaquelà lo biais jacobin de la francimandalha, l’estudi universitari que raja sul bon pòble boca badent, falquetat, aja me l’embuc tè !
Sèm plan luènc de las estudis universitaris, (aquò rai segur n’en cal) granda error d’estrategia que fasetz, pegatz brica a las realitats del mond d’Occitània.
Puèi, risca pas res que m’anguessi far ambe una madaissa d’esquerristas bolzuts pialssuts.
Aqui enquèra, un còp mai, tiratz costièr ! Qu'un marrit biais pecaire ! Qu’una gaupa que fasetz !
#1 justament vos esperàvem per menar un estudi universutari de grand amplor sul subjècte, mercé del vòstre engatjament !
Plan polit de nos parlar del patrimòni dels autres segur qu’es atrasent. Pr’aquò m’auriá estat de grà de nos parlar del patrimòni occitan, qu’es ric e poilit tant coma lo dels autres.
Conscientizar es seguragement de nos entrensenhar, de nos far saber sul patrimòni nòstre.
Son pas un escag lo mond que n’en sabon un briu.
De vos rementar aicíu https://ibb.co/nLTGVpN que n’en parlèri, la primièra toda es de nos coneisser nosaus meteis, e malastrudament ne sèm plan luènc.
Qu’un occitan pòt diser auèi quantes manescrichs en occitan son en frança, dains d’autres país, quantes son a paris ?
De qu’una es la data ont se fasquèc pus los estats generals de lenga d’òc ?
De per qu’un discors de Mitterrand s’ensatjèc de recampar qualques votz maitas a la eleccions de 1981
?
De qu’un èra lo nombre de occitanofòns estimat en 1920 ?
E de tot aquò ni a a roncénsiá, s’en poriá far jòcs, lo jòc de la coscientizacion e la conscientizacion es la pòrta alandada cap a la socializacion e vira la ròda.
Degun si es amanat a-n-aquò, gausi pas pensar que s'es manats fins al mojòl !
I a de que èsser acipat !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari