Eth cors presenciau d’aranés qu’a començat enguan ena Universitat de Barcelona (UB) ei ua reüssida. Es classes comencèren eth 29 d’octobre passat en tot aumplir es 25 places disponibles e sense poder inscríuer totes es sollicitacions. Era formacion en occitan aranés arribe ena UB damb un cors presenciau de nivèu A1 e damb era volontat d’espandir es nivèus de manèra progressiua enquia arribar ath C2. Ei un cors de 40 ores qu’a lòc ena facultat de filologia e comunicacion.
 
Era certificacion oficiau d’aguest cors ei arreconeishuda peth Conselh Generau d’Aran. Ath delà, es escolans obtien 1 credit de liura eleccion e ECTS. Tanben compde coma merit tara borsa d’emplec des ensenhaires.
 
 
“Alugalh dera difusion dera lengua e era cultura d’Aran”
 
Eth cors d’aranés ven acompanhat de conferéncies sus era lengua e era cultura occitanes, dont tanben i aurà ua presentacion de Jornalet as escolans. Segons es servicis lingüistics dera UB, “eth maquinari s’a metut en marcha” entà qu’era institucion sigue “er alugalh dera difusion dera lengua e era cultura d’Aran en Barcelona”.
 
 
Sosten institucionau
 
Eth cors, amiat pera Universitat, compde damb eth sosten economic dera Generalitat de Catalonha. Ath delà, eth govèrn d’Aran a donat es libres d’estudi e er Institut d’Estudis Aranesi – Acadèmia Aranesa dera Lengua Occitana a aufrit quauques publicacions coma era gramatica aranesa, es conjugadors, etc...
 
Totes aqueres publicacions se pòden tanben trobar en centre d’autoaprendissatge de lengües dera universitat e tanplan ena bibliotèca.




FM


 
 

fffff		fffff
	Jornalet ena escòla Jornalet qu'a ua seccion especifica sus era escòla occitana. Mos shautarie qu'es escòles, siguen Calandretes, escòles bilingues o escòles araneses, poguen eres madeishes contribuir en aguesta seccion damb notícies, entà qu'es madeishi escolans les poguen redigir en tot explicar aqueri hèti que son notícia en cada estudi: ua excursion culturau, ua visita d'ua personalitat, ua hèsta populara damb es pairs, ua competicion esportiua, èca. Evidentaments, es fotografies, es enregistraments o es imatges de vidèo seràn plan benvengudes, se n'i a. Pensam que pòt èster un bon punt d'amassada tara comunitat educatiua occitana, ua iniciatiua interessanta entàs escolans e ua airina de socializacion lingüistica entàs familhes des escolans. Demoram de poder compdar damb eth vòste sosten, e demoram que Jornalet sigue ua airina utila entàs escòles occitanes. Manatz-mos es vòstes notícies a info@jor…