Lo primièr ministre d’Índia, Narendra Modi, anoncièt divendres passat l’abolicion de la polemica reforma agricòla, aprovada pel parlament del país en setembre de l’an passat, e qu’a causat fòrça protèstas multitudinàrias, quitament en temps de confinament. Segon The Times of India, de centenats de manfestants serián mòrts aquestes meses.
 
La reforma cercava la liberalizacion del sector agricòla e l’eliminacion de las proteccions comercialas que ne beneficiavan los païsans, çò que los obligava d’èsser concurrents dels grands entrepreneires agricòlas e de reduire lors prèses.
 
Lo partit de Modi, lo Bharatiya Janata Party (BJP, Partit del Pòble Indian), afronta d’eleccions regionalas l’an que ven dins dos dels estats mai grands e amb la mai fòrta tradicion agricòla d’Índia. Lo BJP a ja perdut ongan las eleccions regionalas del Bengala Occidental, un autre estat de granda importància demografica e amb un sector agricòla desvolopat.