Àustria torna uèi al confinament fins al 12 de decembre. Las autoritats an decidit d’espandir aquela mesura qu’afectava ja las regions de Salzborg e de la Nauta Àustria, qu’an las taxas de vaccinacion pus bassas. A mai, la vaccinacion serà obligatòria a partir del mes de febrièr. A l’ora d’ara son vaccinats lo 64,8% de la populacion.
 
La setmana passada, la taxa d’infectats de la covid-19 arribèt al 1400 cases per cada 100 000 abitants; aquò vòl dire que l’1,4% de la populacion s’infectèt pendent aquela setmana. La situacion sembla pas insuportabla dins las unitats de suènhs intensius dels espitals, qu’an lo 34% dels lièches vuèges, mas en vesent l’evolucion de las infeccions se crenh que lèu i aja una crisi del sistèma espitalièr.
 
Fa un mes, se raportava environ 1900 infeccions jornadièras, e ara ne son 15 000. Aital Àustria patís las piègers chifras dempuèi que comencèt la pandemia. Per aquela rason, fa de setmanas que las autoritats austrianas insistisson sus la vaccinacion; se requeriguèt lo passador sanitari per intrar dins los bars e restaurants e tanben dins los centres de lésers o d’estetica. Puèi, la setmana passada, lo govèrn decidiguèt de confinar los non-vaccinats.