Tres discussions
 
Al Palais del Trabalh de Narbona, se recampèron un cinquantenat de militants de la causa occitana e aitant mai seguiguèron la jornada a distància.
 
La matinada e la debuta del vèspre foguèron consacradas a tres expausats. Gustau Aliròl parlèt d’economia e de territòri per anar cap a de vertadièras relocalizacions. Clara Gago-Chidaine faguèt lo punt sus las seguidas de la Lei Molac e sus la mobilizacion de manténer. David Grosclaude dreicèt lo panorama de l’ipercentralizacion mediatica en França, los mejans de comunicacion concentrats a París e dins las mans siá del poder, siá de qualques grops financièrs que s’estacan a fargar l’opinion a lor idèa e per lors interèsses.
 
 
Preparar 2022
 
Puèi, se parlèt de l’annada electorala de 2022 entre responsables del partit occitan, caps de las listas occitanistas a las regionalas en Provença e Occitània centrala, militant·a·s de basa, etc. L’aficha d’apèl a la jornada o estipulava plan: “Es venguda l’ora de far de politica?”. Tot lo monde parla de la presidenciala, mas pels participants, cal defugir aquela personalizacion dels debats que, de fait, son pas menats, e denonciar lo caractèr monarquic d’aquel foncionament vertical del poder.
 
D’un punt de vista occitan e occitanista, s’insistiguèt sus la necessitat de balhar la paraula e una representacion als territòris. Se prenguèt coma exemple lo trabalh menat pels elegits de Regions e Pòbles Solidaris al dintre del grop parlamentari Libertats e Territòris. Fin finala, se lancèt la Crida que traparetz aicí e que serà seguida lèu d’acamps regionalizats per anar cap a de candidaturas autonòmas, per refortir e afortir una preséncia occitana sul terren politic, per despassar lo sol engatjament (necessari mas insufisent) cultural.
 
 
 
 
 
Alan Roch


 

fffff		fffff
	Tèxt de la Crida de Narbona   I aurà de candidats per representar las idèas regionalistas occitanas a las legislativas de 2022.   En seguida de las discussions que se son debanadas a Narbona dins l’encastre de la Dintrada es estat decidit d’ocupar lo terren electoral al mes de junh per las eleccions legislativas.   Avèm de promòure las idèas de descentralizacion, de desvolopament equilibrat dels territòris, de politica coerenta per lutar contra lo cambiament climatic, de defensa e de promocion de la lenga nòstra e d’autras encara.   La politica se deu far en cò nòstre e pas solament a París.   I aurà de candidats per dire aquelas causas e per portar aquelas idèas.   A Narbona ja un quinzenat de personas an dit lor intencion de se presentar e de faire campanha.   Podèm e devèm èstre mai nombroses per que pertot dins las regions de l’espaci occitan lo messatge pòsca passar e per que lo mai gran nombre d’electors pòscan dire que vòlon un vertadièr cambiament dins lo biais de far de politica.   Nos trobarem dins tres amassadas regionalas per organizar la mesa en plaça d’aquela sequéncia electorala que serà dubèrta a totas e a totes los que se reconeisson dins la necessitat de donar als territòris occitans una paraula politica.   La discussion de la lei Molac foguèt possibla sonque gràcias a una dinamica collectiva.   Nòstra iniciativa se farà dins l’encastre d’una volontat que se met en plaça dins d’autras regions e amb l’ajuda de Regions e Pòbles Solidaris.    Las personas interessadas per l’iniciativa e que vòlon èstre informadas an de clicar sul ligam seguent: https://bit.ly/cridaoc