Quand tot lo Mond es a esperar lo passatge, plan près de la Tèrra, de l’asteroïde 2012 DA14, un autre asteroïde, de dimensions fòrça mai redusidas, es casut sus Russia, concretament dins la region de Cheliabinsk, en los Orals, fòrça près de Cazacstan. L’impacte a causat un bruch fòrt qu’a trencat fòrça fenèstras d’ostals que n’èran près, e mai a causat qualques ferits, segon d’informacions del ministèri de l’Interior rus. La television Russia Today parla de quatre cents ferits.
 
Los testimònis de la casuda del meteorit explican aver vist d’objèctes incandescents que casián del cèl, e tanben relatan lo son d’una explosion. I d’a enregistraments faches per de vesins ont se pòt veire la traça de fum que daissa lo meteorit dins lo cèl e ont s’entend una granda explosion; lo tech d’una usina qu’es tombat; las alarmas de qualques veituras qu’an començat de sonar.
 
Lo pòrtavotz del ministèri, Vadim Kolesnikov, a explicat que dins una escòla i a agut qualques ferits, justament a causa de la trencadura dels veires de las fenèstras. E lo meteis ministèri precisa que i a pas agut una pluèja de meteòrs, coma avián dich qualques mèdias locals, mas que lo meteorit s’es fragmentat dins la part bassa de l’atmosfèra.