Apple ven de far sa denóncia contra NSO Group, la societat israeliana qu’a fargat lo logicial d’espionatge Pegasus e que l’a vendut a de govèrns. Mai de 100 000 personas ne son estadas victimas, mai que mai de politicians, activistas e jornalistas. Lo gigant dels ordenadors de la poma vòl, amb sa denóncia, defendre totes los usatgièrs dels dispositius d’Apple que son estats victimas d’aquel logicial. Dins aquel sens, demanda als tribunals que siá enebit a la societat NSO Group d’emplegar quina mena que siá de logicial o material d’Apple.
 
“D’actors amb de sostens estatals coma NSO Group despensan de milions de dolars en tecnologias sofisticadas d’espionage sens aver de rendre comptes. Aquò se deu cambiar”, çò a declarat lo vicepresident d’engenhariá, Craig Federighi. A mai, a assegurat que los dispositius d’Apple son los mai segurs del mercat, e mai deplora que los nòus logicials d’espionatge “sián de mai en mai perilhoses”.
 
En julhet de 2020, informàvem dins Jornalet que mai d’una centena de personas èran estats espionats amb aquel logicial per telefòns intelligents que solament los govèrns dels estats podián aquerir. E en julhet passat raportèrem cossí Microsoft veniá de desvelar que los espionats èran mai de 100 000 e mai de 50 000 los numèros de telefòn piratats. Demest los espionats se tròban lo president de la Generalitat de Catalonha en exili, Carles Puigdemont, e plan d’autres independentistas catalans. Tanben ne foguèt victima lo president francés, Emmanuel Macron, l’èx-primièr ministre Édouard Philippe e catòrze ministres del govèrn francés. Segon d’informacions publicadas per Le Monde, lors numèros de telefòn foguèron triats per un servici de seguretat de l’estat marroquin, utilizaire del logicial d’espionatge.