Avèm trobat sus Spotify una lista de cançons de musica occitana amb mai de 1270 cançons, çò es mai d’82 oras de musica en lenga nòstra. La lista l’a facha Theò Bajon, un jove felibre collaborador de Jornalet originari del Comtat Venaicin mas qu’ara demòra a Genèva.
 
“Ai fach aquesta playlist perque voliáu mostrar a d’amics que i aviá fòrça musica en occitan e que n'i aviá per totei lei gosts”, çò diguèt Bajon a la redaccion de Jornalet. “Assage de la metre a jorn quora tròbe de nòvas musicas, e quora i a un album que sortís. La playlist es publica, es a dire que totei la pòdon escotar”, çò precisèt.
 
Al delà de l’enòrma lista creada per Bajon, avèm trobadas d’autras 125 listas restacadas amb la musica occitana sus la meteissa plataforma, çò que mòstra que la santat de la cultura nòstra es pro bona malgrat l’ultraminorizacion de l’usatge social de la lenga.