Lo Pargue Nacional dels Pirenèus a installat a la cima de l’estacion d’Hautacam (Lavedan) un mirador de nuèch que prepausa de se (tornar) connectar amb lo cèl estelat. Un esquipament que pren plaça dins tot lo dispositiu de lucha contra la pollucion luminosa dins tot lo departament dels Nauts Pirenèus, çò rapòrta France 3.
 
Rendètz-vos a la cima de l’estacion d’Hautacam près del pargatge de Tramassèl per descobrir aquela nòva installacion: un mirador per espiar lo cèl estelat a Hautacam en Bigòrra. A l’origina del projècte, i a lo Pargue Nacional dels Pirenèus, que vòl tornar connectar los abitants e los vesitaires d’aquelas valadas amb la beutat del cèl nuechenc.
 
 
Luchar contra la pollucion luminosa
 
Aquel projècte s’endraia dins un camin mai larg qu’a per amira de demesir la pollucion luminosa dins los Pirenèus. Per tant, lo mirador es estat installat dins la Resèrva Internacionala de Cèl Estelat (RICE), creada en 2009. Recampa 247 comunas e s’espandís sul 65% del departament.
 
Lo mirador prepausa als amoroses del cèl una taula pedagogica qu’explica las constellacions en escritura fosforescenta e un “banh de nuèch” ont los vesitaires son convidats a s’alongar per observar confortablament las estelas.
 
Lo Pargue Nacional dels Pirenèus apond que lo 40% dels fluxes de lum emeses per l’esclairatge public se’n van devèrs lo cèl, çò que congrèa de pollucion luminosa. Es lo grand combat de la RICE: reduire l’intensitat luminosa de las vilas e vilatges la nuèch mas tanben trobar un biais de redirigir lo lum cap al sòl.
 
Seriá saique important de prepausar que los tèxtes poguèsson tanben èsser fornits en occitan.