Actualitats
Mòrt de Rémi Fraisse: l’estat francés designat responsable mas “sens fauta” pel tribunal administratiu de Tolosa
La familha de Rémi Fraisse a denonciada una evidenta “denegacion de la realitat”
Tèxte legit
Per tal d’engatjar la responsabilitat de l’estat, los parents, la sòrre e las grands del jovent avián sasida la justícia, qu’a de mai decidit que los teneires de drech que representan la victima seràn indemnizats per prejudici moral per una soma de 46 400 èuros.
D’en primièr, lo tribunal a escartada la responsabilitat de l’estat francés dins l’afar per çò que —çò explica lo tribunal— “Rémi Fraisse podiá pas èsser considerat coma una persona non concernida per las operacions policièras que menèron a sa mòrt tragica.”
Pr’aquò, lo tribunal a acceptada la responsabilitat sens fauta de l’estat sul fondament de l’article L 211-10 del còde de la seguretat intèrna. Aqueste article prevei que l’estat es “civilament responsable dels degalhs e damatges que resulten dels crimes e delictes comeses, dobèrtament o per violéncia, per d’amolonaments o recampaments armats o non armats, siá contra las personas, sia contra los bens”. Lo tribunal reten ça que la una “imprudéncia colpabla comesa per la victima que pòt exonerar en partida l’estat de sa responsabilitat”.
Una denegacion de la realitat segon la familha de Rémi Fraisse
La familha de Rémi Fraisse a denonciada una evidenta “denegacion de la realitat” dins un comunicat paregut aqueste dijòus 25 de novembre.
Precisa qu’es una negacion de “çò que se passèt realament sul luòc de Sivens, una denegacion de la responsabilitat de las autoritats civilas, del prefècte de Tarn fins al primièr ministre dins aquela operacion”. Assabenta, enfin que contunharà de luchar per “l’onor de Rémi e per totas las victimas de la violéncia d’estat.”
|
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#4 Elegit occitan vol pas dire elegit occitanista !
#3 De qu'entendètz quand parlatz dels elegits "occitans" de la plana de Tarn ? Es qu'aqueles se sentissan e se defenissan vertadièrament atal ? Vos riscatz, per ideologia occitanista a qualificar d'elegits "occitans" d'elegits que se considèran saique pas coma d'occitans mas de segur coma d'obedissents elegits franceses de la "Republica Francesa una e indivisibla, qu'es gloriosament dirigida per la man sevèra mas justa de l'ufanosa Paris ben-aimada, amen."
L'identitat d'aqueles elegits es benlèu un pauqueton ( e encara, vergonhosament !) "méridionale" mas es mai que mai e abans tot fisèlament e fièrament francèsa, sustot pas "occitana" , cal pas quichar !
La responsabilitat primièra es la dels elegits occitans de la plana del Tarn, que fan finançar per lo departament de Tarn l'irigacion intensiva de la plana e la megazona de logistica camion dita Pòrta del Tarn. Aquel ser, los responsables occitans del departament organizeron las condicions per una confrontacion violenta, per poder contunhar tranquilament la betonizacion de la plana de Tarn. Lo prefècte seguissèt lor proposicion.
E n'i a que creson encara que sèm dins un estat de drech... amb un poder judiciari independent de l'executiu.
Mòrt de Remesi Fraisse : l’estat francés designat responsable mas “sens fauta” pel tribunal administratiu de Tolosa ? Del temps que la familha Fraisse denóncia una evidenta “denegacion de la realitat”, denóncii ieu un pas de mai cap abans en direccion de la fascizacion generalizada de las politicas estatzalas europèas : d'ara enlà, non es mai una fauta de tuar un manifestant s'opausant al neoliberalisme. Autrament dit, l'estat non comet cap de fauta en tuant los opausants politics. O disi als fascistas que trollejan Jornalet : non es la pena de votar per de calucs d'ultradreita. L'ultradraita, l'an ja servida, aicí e ara, qu'arriba al pas de l'auca.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari