Rugbi de XIII: partidas indecisas en Elèit 1
 
Un cas de covid cò dels Tigres: pas de partida Albi-Limós. La pluèja que tomba en abondància, la comuna que vòl protegir la pelena: pas de rescontre Carcassona-Sent Gaudenç, un primièr temps desplaçat al dimenge abans d’èsser reportat. Los dos rescontres se deurián jogar lo 18 de decembre.
 
Demorava doncas doas partidas al programa de l’Elèit 1. Se revelèron indecisas. Al Molin, l’FCL sortiguèt victoriós de l’afrontament amb los Dragonets: 24-22. A Tolosa, un tombat e una penalitat dins las darrièras 5 minutas permetián a Vilanòva de ganhar 29-26.
 
Per la primièra dimenjada de decembre, en cap d’aficha, lo dèrbi a l’Agulha entre Limós e Lesinhan. L’FCL anóncia la dintrada de James Maloney jos las colors verda e blanca per aquesta partida. Carcassona se desplaçarà a Vilanòva; los Dragonets reçaupràn a Sant Estève lo TO; Avinhon se desplaçarà a Sent Gaudenç.
 
 
Questions d’emenda e d’estadi a Perpinhan
 
Lo president Guasch a degut metre la man a la pòcha per aver dit çò que pensava de l’arbitratge de la finala de la Superliga qu’estimava desfavorable als Sang e Aur. La Comission de disciplina li demanda de pagar 10 000 liuras, çò que fa 11 900 èuros (2900 benefícian d’un ajornament sus 3 ans) . E òc, es tot un art de capitar a se calar.
 
Mas lo president Guasch a tanben respondut al conse de Perpinhan dins una entrevista balhada a L’Indépendant aprèp los prepauses de l’elegit que disiá que desirava de veire los Dragons e l’USAP utilizar amassa l’estadi Giral per daissar Brutus a un club professional de fotbòl!
 
Lo president tretzista argumenta: “Brutus es nòstra istòria dempuèi mai de 60 ans. Las condicions son pas las meteissas aicí qu’a Tolosa. A Brutus, avèm 20 permanents administratius, una botiga, un restaurant e fasèm venir plan d’angleses dins la contrada”. De son costat, lo president de l’USAP se ditz dobèrt a la discussion. Afar de seguir…
 
 
Lo calendièr de la Superliga per 2022
 
Tolosa e los catalans coneisson lor calendièr de 2022. D’entrada, los catalans aniràn jogar en Anglatèrra lo revenge de la finala contra Saint Helens lo dijòus 10 de febrièr per dobrir la sason. Lo retorn es fixat al dissabte 2 de julh: a l’estadi Velodròm?
 
Los Dragons reçaupràn lo TO lo dijòus 14 d’abril. Retorn previst lo dijòus 25 d’agost. De notar qu’es pas totjorn lo dissabte que los Dragons reçaupràn a Brutus: partidas son previstas un dijòus e quatre divendres e, tanplan, un diluns.
 
Los Dragons voldrián plan jogar 2 partidas de preparacion: una contra Tolosa, l’autra contra una seleccion d’Elèit 1.
 
Tolosa entamenarà la sason en recebent los Gigants d’Huddersfield lo dissabte 12 de febrièr. Polit present: jogaràn tres còps contra lo campion Saint Helens: a domicili; los dissabte 19 de març e 4 de junh e a l’exterior, lo dissabte 3 de setembre, darrièra jornada de la fasa de classament.
 
L’estadi de Newcastle reçauprà la Dimenjada Magica: lo dissabte 9 de junh, Tolosa rescontrarà Wakefield e los catalans veiràn venir lo dimenge 10 los Lops de Warrington per los afrontar.
 
 
Un campionat d’Elèit 2 a 10 clubs
 
La Federacion ensagèt de metre sus pè un campionat d’Elèit 2 a 14 clubs. Fin finala, 11 comencèron la competicion. Malgrat totas las anóncias de signaturas, las Làmias de Montpelhièr venon d’èsser fòrabandits de la competicion aprèp tres partidas non jogadas. Aquò manca un pauc de seriós… Nos agrada mai de senhalar la partida entre lo VARL e Vilafranca de Roergue que se jogarà dimenge a Vilanòva de Menerbés. La recèpta de la partida serà balhada a l’associacion locala que luta contra la mucoviscidòsi.
 
 
 
 
Alan Roch