L’Euroregion Pirenèus-Mediterranèa  s’es endevengut de crear un grop de lengas per promòure l’occitan e lo catalan. Aquela entitat transfrontalièra de cooperacion politica entre las illas Balearas, la region qu’a pres lo nom d’Occitània e lo Principat de Catalonha e Aran lança dos projèctes per donar de vam a sas doas lengas pròprias e territorialas. Un dels projèctes es la promocion de l’occitan e del catalan pels joves suls rets socials e dins los nòus encastres de comunicacion, coma Twitch o Tik-Tok, e un autre pels escambis d’ensenhaires per partejar d’experiéncias sus l’ensenhament de la lenga als adultes. En mai d’aquò, an estudiat la viabilitat d’un projècte de traductor neuronal per l’occitan e pel catalan, çò rapòrta la Generalitat de Catalonha.
 
Lo grop de promocion de l’occitan e del catalan s’endevenguèt la setmana passada dins una reünion de l’Euroregion amb la participacion de l’elegit occitan Benjamin Assié; de l’encargat de mission per l’occitan e lo catalan, Vicent Rivière; del cap del gabinet tecnician del Departament de Cultura de la Generalitat de Catalonha, Francesc Vilaró, e del responsable del servici de sosten a l’occitan en Catalonha, Xavier Moral.