Es l’istòria d’una petita escòla que voliá subreviure fàcia a la crisi de la Covid 19. La calandreta de la Dauna es una escòla associativa, situada a Peçac (la Grava) dempuèi près de 20 ans (foguèt creada en 2002). S’agís d’un establiment privat jos contracte amb l’Educacion Nacionala francesa que prepausa un ensenhament immersiu en occitan, aquí gascon.
 
Al mes de març 2020, lo primièr confinament interrompèt brutalament la sason de las manifestacions. Calguèt perpensar per tal de trobar de novèls biaisses de finançar l’escòla e d’aculhir de novèls escolans. Aital s’alestiguèt lo projècte d’una granda tombòla.
 
Al mes de decembre 2020, Florian Thomas, un dels parents de l’associacion, ausiguèt l’entrevista de Francis Cabrel dins la quala l’artista defendiá la lenga e la cultura occitanas. Sa novèla cançon, Rockstars du Moyen Âge, es un omenatge als trobadors. Florian decidiguèt de sollicitar lo cantador per li demandar d’ajudar l’escòla. Jean Bonnefon (del grop Peiraguda), un bon amic del cantaire, li respondèt. Aqueste revirèt las paraulas de la cançon Rockstars du Moyen Âge en occitan.
 
Rapidament, Francis Cabrel acceptèt l’idèa d’ajudar la calandreta mas volguèt qu’aquò foguèsse una escasença de s’engatjar per l’occitan pel mejan de l’escòla. Causiguèt alara de porgir una guitarra Lâg (marca del Sud de França) dedicada. Florian Thomas, qu’es laütièr, personalizèt el meteis l’instrument: fabriquèt una placa de proteccion que representa la crotz occitana. Puèi Charlotte Jean-Louis (Le temps du décor), una maire d’escolan pintra de decòrs, creèt un pegasolet per aculhir la signatura de l’artista sens afrabar l’instrument.
 
Aquela guitarra dedicada es pas lo sol prèmi de ganhar a la lotariá. I a agut una granda èrsa de generositat per la calandreta. Fin finala, 14 lòts son estats constituits. L’escòla a recebut de dons de The Inspector Cluzo, Nadau, Les Ogres de Barback & le Bal Brotto-Lopez, Peiraguda, dels labèls de musica occitana Pagans e Siventés, Macca Music e de l’especiariá en linha lescadetsdegascogne.fr qu’an respondut presents sens trantalhar.
 
 
Informacions practicas
 
Los bilhets de la tombòla son per vendre sus Hello Asso entre lo 1r de decembre de 2021 e lo 9 de genièr de 2022 amb anóncia dels ganhaires lo 15 de genièr de 2022. Totas las informacions se tròban sul sit Internet de l’escòla (inclús lo ligam cap als bilhets). Ne podètz tanben vesitar la pagina Facebook.
 
 
 

fffff		fffff
	Jornalet a l'escòla Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.  Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans. Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…