Una escomesa pels organizators d’emplenar aquel espaci ont i a plaça per tres mila personas. Mas la mission foguet capitada amb mes de cinc cents dançaires que venguèren escotar e aplaudir lo grop mondin Brotto-Lopez, los Bretons de Torr Penn e La Machine, Quatuor de "Centre-França" com dison eles meteisses. Entre dos grops, lo Bagad bro Tolosa prendrián la relhèva amb lors binioù braz e lors bombardas. Las bevendas se compravan a l’estanquet de la sala amb una moneda fòrça locala, lo Faran, creada per l’escasença. Uns aurelhespeses an cresut pr’amor de la musica amplificada a un retorn del franc.

 

Segon Pèire Vieussens, organizator e sòci dels Arpalhands, "lo trabalh collectiu es estat a la debuta pesuc de lançar a mai d’una associacion, mas la capitada es al rendètz-vos e lo vam dels dançaires, sovent fòrça joves, fa gaug de veire e balha l’enveja de lo tornar far".

 

La serada èra precedida d’estagis de dança amb Paulette Faucon que los afogats de trad coneisson plan, mas tanben d’intruments coma lo violon, la votz, la sonsàina e l’acordeon diatonic.

 

Una capitada de las bèlas doncas pel fum de dançaires a que los organizators balhan ja rendètz-vos per l’edicion venenta dins un parelh d’annadas.