Après gaireben dos ans de covid-19, cossí se pòrta l’indústria farmaceutica? The Conversation analisa dins un de sos podcasts setmanièrs ont èran aquelas societats abans l’aparicion del coronavirus e cossí an agit economicament a respècte de la pandemia. De soslinhar las tensions continuas entre los profièches economics e l’accès equitable als vaccins. En seguida, vos prepausam una adaptacion occitana del resumit del podcast, efectuat per Daniel Merino, redactor scientific de la revista, e Gemma Ware, redactritz de las emissions podcast.
 

Abans la pandemia, la reputacion de l’indústria farmaceutica èra fòrça bassa. En agost de 2019, un sondatge de Gallup a prepaus de las opinions dels estatsunidencs suls afars situèt l’indústria farmaceutica a la darrièra plaça, entre 25 sectors.
 
Ray Moynihan, professor adjonch de l’Institut per una Assisténcia sanitària fondada sus de faches, a l’Universitat Bond d’Austràlia, crei que la reputacion de las societats farmaceuticas èra tan bassa “perque lor comportament de marqueting se vesiá totjorn que mai fòra contraròtle”. Apond que l’influéncia de las entrepresas suls mètges e la sciéncia medicala e “los prèses exorbitants qu’encaissavan”, combinats amb qualques grandas multas per frauda, avián greujat la reputacion de l’indústria.
 
Totun, i a d’indicis que lo succès de la profession per far un vaccin contra la covid a melhorat la reputacion de l’indústria. Dins un sondatge estatsunidenc realizat per Harris Poll en febrièr de 2021, lo 62% dels interrogats avaloravan positivament l’indústria farmaceutica, un aument d’un 32% a respècte de genièr de 2020.
 
Mas que se passa amb lo rendement financièr de las societats farmaceuticas mai grandas del mond? “Lo panorama general es la nuança”, çò explica Jérôme Caby, professor de finanças corporativas a la Sorbonne Business School de París, França. Malgrat que qualques entrepresas ajan agut fòrça succès, d’autras an perdut fòrça argent, çò ditz. Caby analisèt la rendabilitat de las dètz entrepresas farmaceuticas mai grandas del mond per The Conversation. Son estudi mòstra que lo rendement financièr d’aquelas dètz entrepresas màgers foguèt “impressionant en comparason amb d’autras indústrias” en 2020.
 
Qualques fabricants de vaccins, coma AstraZeneca, s’engatgèron inicialament a beneficiar pas de la venda de lors vaccins, malgrat qu’ara s’aluènhen d’aquel modèl. Mentretant, d’autres, coma Pfizer, an obtengut de grands profièches de lors vendas de vaccins.
 
Totun, s’agissiá pas solament d’argent privat injectat dins aqueles vaccins, mas tanben d’argent public. Per exemple, gaireben 10 miliards de dolars estatsunidencs sortits dels contribuidors dels Estats Units se destinèron al desvolopament del vaccin covid de Moderna.
 
Ara, l’Institut Nacional de la Santat dels Estats Units s’es engatjat dins una batalha legala amb Moderna que vòl pas partejar los dreches dels compausants del vaccin. Ana Santos Rutschman, professora adjoncha de drech a l’Universitat de Saint Louis als Estats Units, explica çò que i a en jòc. “Se i a copropietat, mas que se reconesca pas legalament per mejan del brevet, lo govèrn pòt pas controtlar en darrièra instància la licéncia del vaccin “, çò ditz. Ela argumenta qu’aquò significa que pòt pas gaire contrarotlar se lo vaccin se distribuís d’un biais equitable.
 
Nicole Hassoun, professora de filosofia a l’Universitat de Binghamton, als Estats Units, crei que l’accès als vacins e als medicaments seriá fòrça mai just se lo contraròtle de la distribucion foguèsse public, e non pas entre las mans de las entrepresas privadas. “Cresi que s’o pagam, nos caldriá èsser de proprietaris”, çò ditz. Hassoun suggerís qu’un biais d’o far seriá al nivèl internacional, benlèu jols auspicis d’un nòu tractat sus la pandemia que lo discutisca l’Organizacion Mondiala de la Santat.
 
 
 
Daniel Merino e Gemma Ware
The Conversation
Aqueste papièr fa partida d’una tièra d’analisis consagradas als profièches de las indústricas farmaceuticas amb la covid.