D’abitants de Larzac se son tornarmai organizats contra lo projècte d’una centrala solara. La causa n’es qu’Arkolia Energies vòl far renàisser lo projècte Solarzac que l’aviá abandonat la societat en 2019. Aqueste còp, se presenta dins un format mai moderat e en integrant de proposicions dels abitants de l’encontrada. Mas las associacions environamentalas lo tròban totjorn desmesurat pr’amor qu’ocuparà de tèrras naturalas e agricòlas, çò rapòrta Reporterre.
 
Dijòus passat, Arkolia presentava lo projècte dins una reünion publica, dins la sala de las fèstas del Bòsc davant una trentena de personas. Segon Reporterre, l'emplaçament del projècte es identic a lo de l’abandonat en 2019: lo domeni de Calmels, proprietat privada d’unas 1000 ectaras destinada a la caça privada. A mai, Solarzac considèra l'opcion d'un rescat de las tèrras per las collectivitats localas per 15 milions d'èuros, integralament compensat per un loguièr pagat per l'esplechaire.