En cap d’aficha de la seisena jornada d’Elèit 1, se teniá aqueste dimenge a l’Agulha lo dèrbi entre Limós e Lesinhan. La partida foguèt plan sarrada. Limós marcava un ensag a tres minutas de la fin per menar 18-16, mas Lesinhan capitava una penalitat dins las darrièras segondas. Ne caliá passar pel punt en aur. James Maloney, per sa primièra partida en verd e blanc, ensacava lo tombat que balhèt la victòria a Lesinhan 19-18. Los Molinièrs clavan atal la primièra part de la competicion sens desfaita.

Dissabte, los Dragonets s’èran impausats fàcia al Tolosa Olimpic: 32-4. Dimenge, Avinhon se vesiá las pèiras per ganhar a Sent Gaudenç 24-22. A Vilanòva, Carcassona plegava la partida dins lo primièr temps abans de gardar un larg avantatge: 38-18.
 
Al programa de la setena jornada, que Lesinhan jòga pas, figuran las partidas: Carcassona/Dragonets, Tolosa/Limós, Albi/Avinhon e Vilanòva/St Gaudenç.
 
 
Còps de forqueta
 
Bòlas de picolat e favòls èran al menut dels 250 participants a la taulejada d’avantpartida de Limós-Lesinhan. Dimenge que ven, es un caçolet que l’anóncia Carcassona XIII abans lo rescontre contra los Dragonets. Lo president de Limós pensa de remosar 400 personas lo dimenge 9 de genièr abans lo dèrbi fàcia a Carcassona.
 
Aquel regim de nautas calorias es reservat als dirigents, ancians praticants e sostens. Los jogaires, eles, an puslèu dreit a de conselhs de dietetica per una noiridura equilibrada!
 
 
Los Dragons preparan 2022
 
Amb una serada de gala aqueste dimars 7, los Dragons Catalans tornan sus la sason passada amb la projeccion d’un film original d’una ora, e presentan la sason a venir. Aprèp lo menaire de jòc Mitchell Pearce, dos novèls jogaires jonhon l’efectiu catalan:
   
 
 
Alan Roch