35 collectius dels domenis educatiu, cultural, audiovisual e lingüistic bascos an presentat un manifèst en favor de l’audiovisual en lenga basca. L’iniciativa s’apèla “Pantailak Euskaraz” (Los Ecrans en Basco) e demanda als partits politics que trabalhen per promòure e propagar la produccion audiovisuala en basco e que donen de vam al doblatge e al sostitolatge de qualitat.
 
La còla de Pantailak Euskaraz planh la preséncia cada còp mai petita de la lenga basca dins lo domeni audiovisual, e fa de proposicions per revirar la situacion. Demest aquelas proposicions, soslinham la transparéncia e l’aument del finançament public del sector audiovisual en basco, un refortiment d’EITB (la television publica basca) per que venga un esplech per la normalizacion de la lenga. A mai, tanben demandan que se fonde una plataforma de difusion en basco, que s’assegure e cresca la preséncia del basco dins las plataformas de difusion, que se vòte de leis pròprias pel cinèma e per l’audiovisual, que se garentisca e promòga la preséncia del basco dins los jòcs vidèo e las plataformas creativas, que se crèe un conselh audiovisual pròpri de cada administracion territoriala e que s’ofrisca de contenguts en basco dins los canals de television publica dels estats espanhòl e francés.
 
Demest aquelas proposicions, ne soslinhan de mai concretas. Per exemple, apondre dins la nòva lei generala de l’audiovisual de l’estat espanhòl de quòtas minimalas de basco, tant en çò que tanh a la produccion coma tanben al nombre de contenguts doblats e sostitolats, compreses tanben los de las grandas plataformas: Netflix, HBO Max, Disney+ e Amazon Prime Video. Las proposicions parlan tanben de leis de cinèma pròpri per assegurar un percentatge significatiu de projeccions de cinèma en basco amb de doblatges e sostítols.
 
 

Atzo, @durangokoazoka-n Euskarazko Ikusentzunezkoen Aldeko Manifestua aurkeztu genuen, manifestuan parte hartu eta atxikimendua eman ziguten hainbat eragilerekin. Oso pozik izandako babesarekin! Ia @PantailakEus lortzeko bidean aurrerapaso bat egitea lortzen dugun!! pic.twitter.com/E8TA7xHcY0

— Pantailak Euskaraz (@PantailakEus) December 5, 2021