Lo país votarà dins dos meses sus la creacion d’una collectivitat territoriala que li dobririá las pòrtas per assumir parcialament qualques competéncias. Los socialistas d’Estrasborg e lo Front Nacional i son contra. La fantauma d’una abstencion nauta plana sus la convocacion.

L’an qualificada de “laboratòri” de la descentralizacion en França: Alsàcia votarà lo 7 d’abril que ven sus la creacion d’una collectivitat territoriala, un biais d’organizacion territoriala que li permetrà de concentrar de competéncias dins una sola administracion e que li dobrirà las pòrtas per assumir mai de competéncias, transferidas de París. Mas l’oposicion de partits d’orientacions desparièras e la fantauma d’una abstencion fòrça nauta planan sul projècte.
 
La creacion de la nòva collectivitat es una proposicion que l’a impulsada la conservatritz Union per un Movement Popular (UMP), que govèrna dins las tres entitats politicas alsacianas actualas: lo conselh regional d’Alsàcia e los conselhs generals dels dos departaments alsacians, lo Naut Ren e lo Bas Ren. Lo partit Euròpa Ecologia-Los Verds (EELV) sosten la meteissa posicion qu’an pres los nacionalistas alsacians d’Unser Land, que reclaman la supression dels departaments e l’autonomia d’Alsàcia.
 
Segon lo sit web oficial del referendum, la collectivitat territoriala servirà a unificar las tres administracions mençonadas çai sus en una sola, a far lo sieu govèrn mai eficaç e a sarrar las decisions dels ciutadans. En mai d’aquò, l’objectiu es tanben d’assumir de nòvas competéncias qu’auràn d’èsser “demandadas especificament”, en de matèrias coma l’economia, l’educacion, la cultura, la lenga e l’abitatge (en cap de cas se ditz pas que degan èsser exclusivas, ni tanpauc que la nòva collectivitat aja una capacitat legislativa).
 
 
Oposicion del PS e de l’FN, per de motius desparièrs
 
En novembre passat, los representants del conselh regional e dels dos conselhs generals votèron fòrça largament en favor de la creacion de la collectivitat alsaciana unificada. A la fin del mes passat, las tres institucions tornèron votar (non pas a l’encòp) e se capitèt tornarmai una granda majoritat en favor de l’unificacion de las institucions d’Alsàcia.
 
Ça que la, s’en novembre passat los vòtes foguèron de 108 sus 122 en favor, ara son 101. Pel camin, l’oposicion al projècte a crescut dins lo Partit Socialista (PS), particularament a Estrasborg. Los socialistas de la capitala alsaciana considèran que lo projècte pren pas en compte l’especificitat d’Estrasborg coma airal metropolitan. Lo fach que lo projècte preveja que lo sèti del govèrn alsacian serà a Colmar, e non pas a Estrasborg, ajuda pas a apondre lo sosten dels socialistas estrasborgeses.
 
Del sieu costat, lo Front Nacional (FN) s’opausa tanben al projècte perque lo vei pauc clar. La formacion presidida per Marine Le Pen considèra que i a pas pro d’informacion per decidir se la collectivitat serà profechabla quant a l’“impacte financièr, la reduccion dels còstes, l’eficacitat e la racionalizacion”. L’FN compren pas tanpauc perqué se vòl manténer doas “conferéncias departamentalas”, se l’objectiu declarat es lo d’unificar las competéncias.
 
Son contra, tanben, maites representants locals dels centristas del Modèm e dels nacionalistas pròfranceses de D’Aut la Republica. Amassa organizan la campanha “Ieu aimi Alsàcia e vòti de non” per convéncer los alsacians que, lo 7 d’abril, balhen pas lo lor sosten al projècte.
 
 
Cal 25% de participacion
 
L’autre obstacle per l’aprobacion del projècte es l’abstencion. Segon las leis francesas, per que lo referendum del 7 d’abril e siá valid, cal que i vòten almens 25% dels electors en cadun dels dos departaments. Richard Kleinschmager, professor de geografia politica a l’Universitat d’Estrasborg, disiá lo mes passat a l’AFP que “l’enjòc principal” del referendum seriá “sens cap de dobte” d’arribar a 25%.
 
 
 
 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.