Lo govèrn putschista de Birmania a fach condemnar Aung San Suu Kyi a 2 ans de preson per incitacion a l’insurreccion e mancament a las restriccions contra la covid-19. Lo tribunal militar li a infligida una pena de 4 ans de preson e, puèi, de 2 ans. Pasmens, l’activista e èx-conselhièra especiala d’estat (cap de govèrn) deu afrontar encara d’autres procèsses per de delictes coma la possession illegala de walkie-talkies e lo mancament a de secrets d’estat. Tot comptat e rebatut, aquò li poiriá costar una pena de cent ans de preson. Son avocat, ça que la, considèra absurdas totas aquelas acusacions. L’audiéncia s’es tenguda a pòrta barrada, sens la preséncia d’observaires internacionals e amb l’avocat de la defensa empachat de parlar amb los jornalistas.
 
Dempuèi lo còp d’estat militar, s’es tuat mai de 1200 personas e se n’es detengut mai de 10 000, segon l’associacion dels  presonièrs politics de Birmania.  Lo putsch aguèt luòc lo 1r de febrièr, lo jorn que se deviá constituir lo parlament sortit de las eleccions del 8 novembre de 2020 amb una Aung San Suu Kyi plan refortida. La cap birmana e son partit istoric contra la dictatura aviá clarament ganhadas las eleccions vistas coma un referendum sus la gestion del govèrn de la filha del paire de l’independéncia birmana.
 
Aung San Suu Kyi foguèt ja detenguda entre 1995 e 2010, fins que los militars entamenèsson una transicion devèrs lo poder civil. En 1990, lo Parlament Europèu reconeguèt sa lucha en favor de la democracia e dels dreches umans davant la dictatura militara, e li autregèt lo prèmi Sakharov. Un an pus tard, emportariá lo prèmi Nobel de la Patz.
 
Ça que la, son actitud davant lo chaple del pòble rohingya foguèt durament criticada. Las gents d’aquela minoritat, considerada coma la pus secutada de la planeta, an pas pus lo ciutadanatge dempuèi 1982 e son massacradas pels militars de Birmania, davant l’indiferéncia de Aung San Suu Kyi. Per aquela rason, en 2018 Amnestia Internacionala li levèt sa distincion e en setembre passat lo Parlament Europèu li retirèt lo prèmi Sakharov. Totun, Aung San Suu Kyi defendèt en persona davant la Cort Penala Internacional la persecucion dels rohingyas en tot assegurar qu’èran una menaça terrorista. Aquò li portèt mai de popularitat dins son país.