Una cadena umana per defendre l’ensenhament immersiu se ten uèi, de 12h a 13h, davant lo rectorat de Bordèu. La manifestacion seguís la crida de Seaska e lo collectiu Azterketak Euskaraz amb la tòca de defendre l’ensenhament immersiu e lo drech dels escolans de passar lor examen en basco.

Las organizacions per l’educacion en basco, Seaska e lo collectiu Azterketak Euskaraz, planifican una manifestacion a Bordèu, aqueste divendres 10 de decembre de 2021, amb la tòca de defendre las modalitats d’examen (brevet e bachelierat) en lenga basca. Convidan lors sostens a venir nombroses per participar a la cadena umana que se desplegarà de 12 oras a 13 oras, del rectorat, carrièra Josèp de Caralhon-Lator, fins al pòrge dels Dreches de l’Òme. Los organizaires crenhon l’arribada d’una nòva circulara venguda del Ministèri de l’Educacion Nacionala francesa que deu reglamentar lo modèle d’immersion, çò rapòrta Sud-Ouest.
 
Los organizaires exprimisson lor inquietud per quant a la possibilitat de contunhar de passar d’espròvas de brevet e de bachelierat en lenga basca, coma aquò èra lo cas abans 2017. Dempuèi l’arribada del ministre actual de l’Educacion, tot es tras que fosc, e mai lo primièr ministre parlèsse d’aviar un “dispositiu securizat” per l’ensenhament immersiu a l’ocasion d’un rescontre al mes de setembre passat.
 
 
354 escolans pertocats
 
A la mitat de l’annada escolara, los defensors de l’ensenhament immersiu dison l’importància que los escolans concernits (114 liceans e 240 collegians) pòscan passar lor examen en basco. Çò que defendràn aqueste 10 de decembre a Bordèu, a l’escasença de la Jornada Internacionala dels Dreches Umans, perque “lo principi dels dreches lingüistics fa partida de la declaracion universala, dont un dels redactors foguèt René Cassin”, çò conclutz Hur Gorostiaga, lo director de Seaska.
 
Jornalet es evidentament solidari dels manifestants e convida los qu’o poiràn a sosténer aquesta accion amb de bandièras occitanas, per insistir sus la necessitat nòstra que l’ensenhament immersiu de l’occitan se desvolope pertot en Occitània.
 
 
 
 

@seaskaikastola#euskarazbizipic.twitter.com/Zckd0tswXB

— Karlos Aizpurua Etxarte (@aizpuruaetxarte) December 2, 2021