S’arrestèt l’activitat de la SAM, entrepresa de metallurgia succursala de Renault, lo 26 de novembre passat, coma Jornalet o raportava dins un article precedent, çò que daissèt los salariats sens amira d’avenir. Aquestes an decidit, ça que la, d’ocupar l’usina durant las fèstas, per tal de “protegir las maquinas”, çò rapòrta Sud-Ouest.

Los 350 obrièrs metallurgistas de la SAM (Societat Avaironesa de Metallurgia) ocupan lor fabrica dempuèi dimars, amb l’idèa d’i passar las fèstas. “Passarem los ressopets de Nadal e del cap d’an sus plaça per protegir las maquinas per fin que sián pas vendudas”, çò a precisat David Gistau, un dels representants sindicals de la SAM installada a Vivièrs, sus las nautors de l'ancian bacin minièr de la Sala.

Foguèt pronónciada lo 26 de novembre passat la cessacion completa d’activitat pel tribunal de comèrci de Tolosa, en seguida del refús de Renault de sosténer lo plan de salvament d’un repreneire. Renault s’èra ça que la engatjat a perseguir lo dialòg amb los emplegats e a lor prepausar d’autres ofèrtas d’emplec dintre lo grop industrial.

“Viure e trabalhar al país”

“De Renault, avèm pas res, pas que de mots”, çò a ajustat David Gistau, que ramenta que dimars passat los salariats getèron al fuòc las proposicions de reafectacion dels mandataris judiciaris que venián de recebre e que jutjavan “indecentas”.

“Un CDD de dos meses a Tolosa per qualqu'un que demòra a la Sala, un pòste d'engenhaire de produccion prepausat a una secretària o de proposicions d'emplecs dins de fondariás a l'autre caire de Franca… nosautres, çò que volèm es viure e trabalhar al país”, çò acaba lo sindicalista.

Dijòus que ven, una novèla manifèstacion de sosten serà organizada davant l'usina. La setmana passada, unas 6000 personas s'èran acampadas a Vivièrs per denonciar l’abandon d'aquel sit industrial.

En direct de la SAM.
2500 personnes pour soutenir les camarades. #JeSuisSam#Aveyronpic.twitter.com/eEGNdnaNaS

— Gaëtan Escorbiac (@GaetanEscorbiac) December 9, 2021