La justícia britanica a decidit que pòt extradir lo fondador de WikiLeaks, Julian Assange, devèrs los Estats Units, ont lo reclaman per aver mancat a la lei de l’espionatge (1917) en tot aver publicat, amb l’ajuda de l’èx-analista d’intelligéncia Chelsea Manning, de documents classificats que restacavan los Estats Units amb l’espionatge diplomatic, de crimes de guèrra e d’autras violacions dels dreches umans. Lo darrièr mot sus l’extradicion l'aurà lo govèrn britanic.
 
La defensa d’Assange aviá argumentat que l’extradicion èra un risc per sa vida a causa de las condicions que l’esperarián dins la preson estatsunidenca e de son delicat estat de santat, sustot de santat mentala que lo poiriá menar al suicidi. La Cort d’Apelacion de Londres a doncas donat rason al govèrn dels Estats Units, malgrat que la defensa d’Assange pòsca encara presentar un recors.
 
Los Estats Units reclaman Assange per aver desvelat de centenats de documents confidencials. L’acusan de 18 delictes d’espionatge e de conspiracion, coma la revelacion de crimes de guèrra comeses en Iraq e Afganistan. Per aqueles delictes, als Estats Units lo poirián condemnar a 175 ans de preson.
 
Assange se tròba encarcerat ara dins la preson de nauta seguretat de Belmarsh, près de Londres dempuèi abril de 2019. L’arrestèron en 2010 al Reialme Unit per un presumit cas d’abús sexual en Suècia, qu’ara es archivat. Long d’aquestes dètz darrièrs ans aviá viscut confinat, primièr assignat a domicili e puèi refugiat dins l’ambaissada de l’Eqüator a Londres. Mas lo cambiament de govèrn en aquel país american, en 2019, li retirèt la proteccion e d’agents de la polícia britanica lo venguèron arrestar.