La dimenjada tretzista foguèt plan estequida en rason de las partidas anulladas per causa de terrens trempes o de qualques cases de covid. Pasmens, las quatre partidas d’Elèit 1 se poguèron jogar.

Elèit 1: jogar a domicili es pas una garentida de victòria
 
Dissabte de vèspre, Albi recebiá Avinhon. Partida marcada per un cambiament d’arbitre a l’ora de jòc aprèp un clacatge d’En Drizza. Lo mesclanha provençal Jack Payne faguèt la diferéncia, per sas acceleracions e son jòc al pè, e permetèt als Bisons de ganhar: 32-24.
 
En serada, dins lo frejum de la nuèit, a Vilanòva, los Orses tenguèron còp un mièg temps abans de plegar jos lo vam dels Leupards qu’avián de se faire perdonar lo carton pres fàcia a Carcassona la setmana passada: 32-16.
 
Dimenge, als Minims, lo Tolosa Olimpic opausèt una brava resisténcia a Limós mas dos ensages sus de contratacas de la longor del terren agèron rason dels locals: 26-10 per Limós .
 
A Domèc, los Canaris se mesfisavan dels Dragonets qu’avián fait tremolar Lesinhan fa una quinzenada. L’Òme Nadal en persona èra vengut seguir la partida! Carcassona dominèt las primièras 40 minutas, mas vendemièt de bravas ocasions. Dins lo primièr temps, los Canaris marquèron dos ensages (12-0 a la pausa). N’ajustavan un tre la represa; los catalans replicavan sus contrataca. Mas la fin de partida foguèt de tot en tot jauna e negra: quatre ensages de mai de marcats, lo darrièr sus la còrna. Amb aqueles sèt ensages, victòria bèla de Carcassona: 41-6. Lo dobertura local, Clamenç Herrero, ensaca sièis transformacions sus sèt e ajusta un tombat per faire bona mesura.
 
Abans Nadal, lo calendièr se metrà a jorn amb Albi-Limós dissabte e Carcassona-Sent Gaudenç, dimenge.
 
 
Elèit 2: lo Minotaure a pas paur dels gròsses
 
L’esquipa de l’Escura qu’èra anada ganhar a Baó fa tres setmanas 36-30 se va impausar aqueste dimenge a Vilafranca de Roergue: 18-12.
 
Los tarneses mòstran atal que caldrà comptar sus eles aquesta sason.
 
A Selon, Gratentor mena 22-18 a la pausa, mas pèrd 48-30. La formacion de Nauta Garona a pas encara conegut la victòria per aquesta primièra sason jogada a aqueste nivèl: per ara, 8 desfaitas se son seguidas, 124 punts marcats fàcia a 412 encaissats (mens 288 a la diferéncia).
 
 
Jòrdi Aillères, nomenat Glòria de l’Espòrt francés
 
Una legenda del XIII, lo pilar Jòrdi Aillères, qu’aviá per escais “Lo Cube”, dintra dins la tièra de las Glòrias de l’Espòrt francés, reconegudas pel Comitat Nacional Olimpic. La ministra dels espòrts participèt a la ceremònia d’entronizacion aqueste dimècres 8 de decembre.
 
Portèt dotze annadas lo malhòt del Tolosa Olimpic. Cò dels Blaus e blancs, empòrta lo primièr bloquièr de campion del club en 1965 e participa a 3 finalas de la Copa de França. Ganha una Copa amb Lesinhan ont jòga una annada (1966). Entraïna puèi la formacion pendent 6 ans: ajusta dos campionats al palmarés del club (1973 e 1975). Ven puèi president del club pendent 5 ans abans de prene de responsabilitats a l’Amicala dels Ancians del TO. A aquela preséncia en club, cal ajustar una brava carrièra internacionala: 34 seleccions, capitani de l’esquipa que jòga la finala de la Copa del Mond de 1968 (perduda 20-2 contra Austràlia).
 
Per ara, quatre autres tretzistas son reconeguts coma Glòrias de l’Espòrt francés: lo primadièr Joan Galià, e tanben Eli Brousse (lo Tigre de Sydney) e Max Rousié. Demòra d’i ajustar de jogaires e jogairas de l’ora d’ara!
 
 
 
 
Alan Roch