Lum verd pel projècte de collègi e licèu immersiu en catalan a Perpinhan. La justícia dona rason a la Bressola fàcia a la comuna governada per Louis Aliot. La Bressola aviá presentat un projècte de collègi e licèu immersiu en catalan dins lo monastèri de Santa Clara. Lo sit religiós aviá barrat sas pòrtas après 750 ans de preséncia e la Bressola aviá pagat 60 000 èuros per ne securizar la crompa. Pasmens, la municipalitat, dirigida per Louis Aliot e lo Recampament Nacional, decidiguèt de far obstruccion a aquel projècte, en obtenent un drech de retractacion dels vendeires. La Bressola faguèt sa denóncia a la cort administrativa de Montpelhièr qu’ara a suspendut la crompa de la comuna.
 
Dins sa resolucion, lo tribunal rebuta los arguments de la comuna contra lo projècte de la Bressola. L’executiu municipal lepenista assegurava qu’èra un risc d’installar un establiment educatiu dins una zòna amb risc d’inondacions e ont es present un cementèri, e mai justificava sa crompa del sit per de rasons de preservacion del patrimòni sens presentar cap de projècte.
 
Ara, la Bressola demanda a la comuna de Perpinhan que retire son ensag de crompa e permeta que s’execute lo projècte de collègi e licèu.
 
Lo 23 d’octòbre passat, qualques centenas de personas manifestèron per las carrièras de Perpinhan per exigir de la comuna qu’arrestèsse son “ataca dirècta contra lo catalan”.
 
La Bressola a mai de 1000 escolans escolarizats en Catalonha Nòrd dins maitas escòlas mairalas e elementàrias e un collègi. Ara, per la dobertura d’un nòu collègi e licèu a Perpinhan, se deu batre contra l’anticatalanisme de l’extrèma drecha que govèrna la vila.
 

Comunicat: El Tribunal Administratiu de Montpeller dona la raó a La Bressola i suspèn la preempció de l'Ajuntament de Perpinyà

Avui i demà, l'escola en català!#LaBressola#CatalunyaNordpic.twitter.com/d5NkZ8sWW0

— La Bressola (@LaBressola) December 15, 2021