Lo primièr ministre en foncions dels Païses Basses, Mark Rutte, a decretat un nòu confinament estricte a causa de l’aument de las infeccions e de l’avançada de la varianta omicron. La mesura intrèt en vigor dissabte a mièjanuèch e durarà fins al 14 de genièr. “Los Païses Basses tornarmai s’arrèstan”, çò diguèt lo primièr ministre. “La cinquena èrsa es aicí e nos arriba amb la varianta omicron”, çò soslinhèt.
 
Pendent lo confinament son barrats los establiments non essencials coma las ostalariás, los musèus, los cinèmas, los teatres, los centres esportius e los pargues d’atraccions. Son tanben tampadas las escòlas e las universitats. Solament son permeses los comèrcis essencials coma las farmacias, los supermercats e las estacions de servici.
 
A mai, las reünions a l’exterior se reduiràn a un maxim de doas personas, e dins los abitatges sonque poiràn intrar dos vesitaires a l’encòp. Pendent la nuèch e lo jorn de Nadal e de Sant Estève e durant la nuèch de cap d’an, se permetrà un maxim de quatre personas.
 
Lo durciment de las restriccions s’impausa pertot en Euròpa a causa de la pojada de las infeccions. Divendres, per exemple, lo govèrn de Danemarc anoncièt que se tampava los cinèmas, teatres, musèus e espacis publics. D’autre caire, lo govèrn portugués comuniquèt fa qualques setmanas qu’après las vacanças de Nadal se decretariá un confinament per contrarotlar la pandemia.