L’enviat de l’ÒNU en Iemèn avertís que la situacion es “la piéger dempuèi d’annadas, la guèrra es mai violenta e la situacion umanitària s'es deteriorada”. O diguèt dimars passat Hans Grundberg, enviat pel secretari general de las Nacions Unidas, António Guterres.
 
Grundberg denóncia “d’atacs incessants amb de missils” que causan de victimas civilas, de damatges a de bens civils e de desplaçaments massisses”. A mai, l’aument de la violéncia afeblís la possibilitat d’arribar a un acòrdi politic per metre lo ponch final a aquela guèrra. D’autre latz, a tanben manifestat son chepic per d’atacs contra l’Arabia Saudita, qu’an tanplan provocat “de victimas civilas e d’infrastructuras destruchas”.
 
Per l’enviat especial de l’ÒNU, l’an 2021 se clava en Iemèn amb “una nòta tragica pels iemenitas que luchan contra la pauretat, la famina e de sevèras restriccions de lor libertat de movement”. Dins aquel sens, fa una crida a las Nacions Unidas per que tornen dobrir l’aeropòrt de Sanaa e ajuden los ciutadans a abandonar lo país. A mai, se mòstra dispausat a trabalhar amb los dos costats d’aquela guèrra per “trobar de solucions immediatas, abordar los besonhs umanitaris urgents e permetre un procès politic”.
 
 
Las societats e las bancas que ne tiran profièch
 
Delà la permissivitat dels estats, son las grandas societats qu’aprofièchan aquela guèrra. Un rapòrt publicat en abril passat pel Centre Delàs senhala 80 entrepresas, dont Airbus, BAE Systems, Boeing, China Aerospace Science and Technology Corporation, General Dynamics, Leonardo, LIG Nex1, Lockheed Martin, Navantia, Norinco, Raytheon Technologies, Rheinmetall AG, Rolls-Royce, Textron e Thales Group.
 
A mai, lo rapòrt determina tanben quinas bancas an finançat aquelas societats en tirant de beneficis d'aquela guèrra. Las bancas estatsunidencas son, sens cap de dobte, las qu’an aduch mai de cabals, seguidas de las bancas del Reialme Unit, de França, Canadà e Espanha.
 
Atal, las bancas francesas que finançan e aprofièchan aquel desastre umanitari son, per òrdre de beneficis obtenguts, Crédit Agricole, Société Générale, BPCE Group, BNP Paribas e AXA. Quant a las bancas espanhòlas, avèm Banco Bilbao Vizcaya Argentaria (BBVA), la banca Santander e la Societat Estatala de Participacions Industrialas (SEPI)
 
 
La guèrra
 
Dempuèi març de 2015, las armadas d’un desenat de païses, dirigits per l’Arabia Saudita, atacan la milícia shiita dels huthis en Iemèn. Aquesta milícia, tanben coneguda coma Ansar Allah (los Partisans de Dieu) a lo supòrt d’Iran. Participan als bombardaments cinc païses del Conselh de Cooperacion del Golf ansin coma Egipte, Marròc, Jordania, Sodan e Paquistan. De lor costat, los Estats Units autorizèron un sosten logistic als atacs saudianas contra los huthis.